एजेन्सी । एकदिवसीय विश्वकप २०२३ को दोस्रो सेमिफाइनल खेल आज बिहीबार हुँदैछ । पाँच पटकको च्याम्पियन अष्ट्रेलिया र आफ्नो पहिलो विश्वकप उपाधिको खोजीमा रहेको दक्षिण अफ्रिकाबीच कोलकाताको इडेन गार्डेन स्टेडियममा दिउँसो सवा २ बजे खेल सुरु हुनेछ ।
अस्ट्रेलियाले ९औं पटक र दक्षिण अफ्रिकाले ५औं पटक एकदिवसीय विश्वकपको सेमिफाइनल खेल्नेछ । दक्षिण अफ्रिका एकपटक पनि फाइनलमा पुग्न सकेको छैन ।
दुवै टोली प्रतियोगिताको इतिहासमा तेस्रो पटक सेमिफाइनलमा भिड्दैछन्, यसअघि सन् १९९९ र २००७ मा पनि नकआउटमा दुवै टोली आमनेसामने भएका थिए । अष्ट्रेलियाले दुवै पटक खेल जितेको थियो ।
अष्ट्रेलियाले ८ वटा विश्वकप सेमिफाइनल खेलेको छ, टोलीले आज ९ औं पटक सेमिफाइनल खेल्नेछ । आठ खेलमा टोलीले एक पटक मात्र हार बेहोरेको छ भने बाँकी छ खेलमा जित निकालेको छ । एक खेल बराबरी भएपनि अंक तालिकामा राम्रो स्थान बनाएका कारण टोली फाइनलमा प्रवेश गरेको थियो ।
अर्कोतर्फ ४ सेमिफाइनल खेलेको दक्षिण अफ्रिकाले ३ खेलमा हार बेहोरेको छ भने एक खेल बराबरीमा पर्यो । सन् १९९९ मा अष्ट्रेलियासँग नै खेल टाई भएको थियो तर, दक्षिण अफ्रिकाले अंक तालिकाको कारण फाइनलमा स्थान पाउन सकेन ।
विश्वकप बाहेक एकदिवसीय क्रिकेटमा पनि यी दुई टोलीबीच कडा प्रतिस्पर्धा छ । प्रतियोगिताअघि यी दुईबीच दक्षिण अफ्रिकामा ५ खेलको एकदिवसीय शृङ्खला भएको थियो जसमा अष्ट्रेलिया ३–२ ले पराजित भएको थियो ।
दुई टोलीले कुल १०९ खेल खेलेका छन् । जसमा अष्ट्रेलियाले ५० र दक्षिण अफ्रिकाले ५५ खेल जितेको छ । ३ खेल टाई हुँदा एक खेल अनिर्णित रह्यो । विश्वकपमा दुई टोलीबीच ७ खेल भएका छन् । जसमध्ये दुवै टोलीले ३–३ खेल जितेका छन् भने एक खेल टाईमा सकिएको थियो ।
विश्वकपमा अस्ट्रेलियाको सुरुवात खराब रह्यो । टोली पहिलो खेलमा आयोजक भारतसँग ६ विकेटले पराजित भएको थियो । अर्को खेलमा टोली दक्षिण अफ्रिकासँगै १३४ रनले पराजित भएको थियो ।
लगातार २ हारपछि अष्ट्रेलियाले सानदार पुनरागमन गर्दै त्यसपछिका ७ खेल जित्दै सेमिफाइनलमा स्थान बनायो । टोलीले श्रीलंकालाई ५ विकेटले, पाकिस्तानलाई ६२ रनले, नेदरल्यान्ड्सलाई ३०९ रनले, न्यूजिल्याण्डलाई ५ रनले, इङ्ल्यान्डलाई ३३ रनले, अफगानिस्तानलाई ३ विकेटले र बंगलादेशलाई ८ विकेटले पराजित गरेको थियो । लगातार ७ जितपछि १४ अंकसहित टोली सेमिफाइनलमा प्रवेश गरेको हो ।
दक्षिण अफ्रिका प्रतियोगिताको दोस्रो उत्कृष्ट टोलीको रुपमा रह्यो । पहिलो खेलमा श्रीलंकाविरुद्ध ४२८ रन बनाएको टोलीले १०२ रनले जितेको थियो । खेलमा टोलीका तीन ब्याट्सम्यानले शतक प्रहार गरेका थिए । त्यसपछि दक्षिण अफ्रिकाले अष्ट्रेलियालाई १३४ रनले पराजित गर्दै प्रतियोगितामा आफ्नो दबदबा देखाएको थियो तर नेदरल्यान्ड्ससँग रन पछ्याउने क्रममा टोली विखण्डित भयो र खेल ३८ रनले पराजित भयो ।
नेदरल्याण्ड्ससँगको हारका बाबजुद दक्षिण अफ्रिकाले पुनरागमन गर्दै डिफेन्डिङ च्याम्पियन इंग्ल्याण्डलाई २२९ रनले र बंगलादेशलाई १४९ रनले हराएको थियो । टोलीले पहिले ब्याटिङ गर्दै ४ खेल जितेको थियो । उनीहरूको अर्को खेल पाकिस्तानसँग थियो, टोलीले यहाँ पछ्यायो र डेथ ओभरसम्म चलेको खेलमा एक विकेटले जित्यो । लगातार ३ जितपछि टोलीले तालिकाको शीर्ष स्थानमा रहेको न्यूजिल्याण्डलाई १९० रनको ठूलो अन्तरले पराजित गर्यो ।
७ मध्ये ६ खेल जितेर दक्षिण अफ्रिकाले आयोजक भारतसँग खेलेको थियो । कोलकाताको पिचमा रन पछ्याउने क्रममा टोली २ सय ४३ रनले पराजित भएको थियो । अन्तिम खेलमा टोलीले अफगानिस्तानलाई पराजित गरेको थियो । ९ खेलमा ७ जितसहित १४ अंक जोडेको टोली अंक तालिकाको दोस्रो स्थानमा रह्यो ।
