एजेन्सी । श्रीलंकाली क्रिकेट टोलीका पूर्व कप्तान अर्जुन रणतुङ्गाले भारतीय क्रिकेट कन्ट्रोल बोर्ड (बीसीसीआई)का सचिव जय शाहमाथि गम्भीर आरोप लगाएका छन् ।
रणतुङ्गाले श्रीलंका क्रिकेट बोर्डका पदाधिकारीहरूमा जय शाहको प्रभाव रहेको बताए । उनीहरुको मिलेमतोले नै श्रीलंकाको क्रिकेट खराब अवस्थामा पुगेको उनको आरोप छ ।
भारतमा जारी एकदिवसीय विश्वकप क्रिकेटमा श्रीलंका ९ लिग खेलमध्ये ७ खेलमा हार बेहोरेर १० टोलीमध्ये ९ औँ स्थानमा रह्यो । श्रीलंका सेमिफाइनल पुग्नबाट चुक्यो र सन् २०२५ मा हुने आईसीसी च्याम्पियन्स ट्रफीका लागि पनि छनोट हुन असफल भयो ।
सन् १९९६ मा श्रीलंकालाई विश्वकप जिताउने कप्तानले भने– श्रीलंका क्रिकेट जय शाहले चलाइरहेका छन् । जय शाहको दबाबले हाम्रो क्रिकेट बोर्ड धरासायी हुँदैछ । एक भारतीयले श्रीलंकाको क्रिकेटलाई ध्वस्त पार्दै छन् ।
विश्वकपमा श्रीलंकाको खराब प्रदर्शनपछि खेलकुदमन्त्री रोशन रणसिङ्घेले नोभेम्बर ६ मा श्रीलंका क्रिकेट बोर्डलाई बर्खास्त गरेका थिए । अन्तरिम बोर्ड पनि गठन भएको थियो । नयाँ अन्तरिम बोर्डको अध्यक्षमा अर्जुन रणतुङ्गा नियुक्त भए ।
खेलकुद मन्त्रीको आदेशपछि श्रीलंका क्रिकेट बोर्डले अदालत जानुपरेको थियो । बोर्डको पुनरावेदनमा अदालतले खेलकुद मन्त्रीको देशको क्रिकेट बोर्ड बर्खास्त गर्ने निर्णय खारेज गर्यो । अर्थात् रणतुङ्गा अन्तरिम अध्यक्ष बन्न सकेनन् ।
आईसीसीले श्रीलंका क्रिकेट बोर्डलाई निलम्बन गर्यो
श्रीलंका क्रिकेट बोर्ड (एसएलसी)लाई शुक्रबार (नोभेम्बर १०) अन्तर्राष्ट्रिय क्रिकेट काउन्सिल (आईसीसी)ले निलम्बन गरेको छ । बोर्डमा सरकारको हस्तक्षेपपछि आईसीसीले तत्काल प्रभावबाट उसको सदस्यता खोस्यो ।
