एजेन्सी । च्याम्पियन्स लिग फुटबल अन्तर्गत समूह चरणको खेलमा स्पेनिस क्लब बार्सिलोनाले हार ब्यहोरेको छ । गएराति भएको खेलमा बार्सिलोना युक्रेनी क्लब शाख्तार डोनेस्कसँग १–० गोलले पराजित भएको हो ।
शाख्तारलाई घरेलु मैदानमा जित दिलाउन एकमात्र गोल ड्यानिलो सिकानले गरे । उनले खेलको ४० औं मिनेटमा गोल गरेका हुन् । यो नतिजासँगै समूह एच मा रहेको बार्सिलोनाको ४ खेलबाट ९ अंक छ भने टोली शीर्षस्थानमा छ । डोनेस्क ६ अंकका साथ तेस्रो स्थानमा छ ।
गएराति नै भएको यसै समूहको अर्को खेलमा पोर्चुगिज क्लब एफसी पोर्टोले घरेलु मैदानमा बेल्जियन क्लब एन्टर्पलाई २–० गोलले पराजित गर्यो । पोर्टोका लागि एभानिल्सनले पेनाल्टीमा तथा पेपेले खेल सकिनै लाग्दा इन्जुरी समयमा गोल गरे ।
युर्गेन एकेलेनक्याम्पले ५२ औं मिनेटमा रातो कार्ड खाँदै मैदानबाट बाहिरिएपछि एन्टर्प १० खेलाडीमा समेटिएको थियो । पोर्टो ४ खेलबाटै ९ अंकका साथ दोस्रो स्थानमा छ भने अंकविहिन रहेको एन्टर्प पुछारमा छ ।
