एजेन्सी । साविक विजेता इंग्ल्याण्ड यस पटकको एकदिवसीय विश्वकपबाट बाहिरिएको छ । अहमदाबादको नरेन्द्र मोदी स्टेडियममा शनिबार राति सम्पन्न खेलमा अस्ट्रेलियासँग ३३ रनले पराजित भएसँगै टोलीको विश्वकपको यात्रा समाप्त भएको हो ।
७ खेलमा ६ पराजयपछि इंग्ल्याण्ड सेमिफाइनलको दौडबाट बाहिरिने दोस्रो टोली बनेको छ । यसअघि बंगलादेश पनि बाहिरिएको थियो ।
टस हारेर पहिले ब्याटिङ गरेको अस्ट्रेलियाले २८६ रन बनाएको थियो । मार्नस लाबुसचेनले सर्वाधिक ७१ रन बनाए । लक्ष्य पछ्याउने क्रममा इंग्ल्याण्डको टोली ४८.१ ओभरमा २५३ रनमा अलआउट भएको थियो ।
बेन स्टोक्सले ६४ र डेभिड मलानले ५० रनको अर्धशतकीय पारी खेले । अस्ट्रेलियाका एडम जाम्पाले ३ विकेट लिए भने इङ्ल्यान्डका क्रिस वोक्सले ४ विकेट लिए ।
