काठमाडौं । राष्ट्रिय क्रिकेट टोलीका सदस्य सन्दीप लामिछाने साइबर ब्यूरो जाने भएका छन् । एक सार्वजनिक टेलिभिजन कार्यक्रममा आफूबारे दिइएको अभिव्यक्तिलाई लिएर लामिछाने नेपाल प्रहरीको साइबर ब्यूरो जाने भएका हुन् ।
गत शनिबार नेपाल नेटवर्क टेलिभिजन तथा ओएसआर रियालिटी युट्युब च्यानलमा प्रसारण भएको ‘आम्मा कसम याँ दुख्छ’ कार्यक्रममा अतिथिका रूपमा आएकी सावित्रा सुवेदी ‘जयनारी’ले लामिछानेलाई ‘वध गर्नुपर्ने’ अभिव्यक्ति दिएकी थिइन् ।
कार्यक्रम प्रस्तोता बिक्की अग्रवालले लामिछानेको फोटो देखाएपछि सावित्राले उनीमाथि गम्भीर टिप्पणी गर्दै ‘वध गर्नुपर्ने’ सम्मको अभिव्यक्ति दिएकी थिइन् ।
बलात्कार आरोपको मुद्दा अदालतमा विचाराधीन रहेको अवस्थामा मुद्दालाई प्रभावित पार्ने, व्यक्तिको मानमर्यादा गिराउने र वध गर्नुपर्ने भन्ने जस्तो गम्भीर अभिव्यक्ति टेलिभिजन कार्यक्रममा सामान्य तरिकाले टिप्पणी गरिएको भन्दै कानूनी उपचार खोज्ने सन्दीपको तयारी छ ।
कार्यक्रमका निर्माता, प्रसारण भएको संस्था, प्रस्तोता तथा बोल्नेविरुद्ध मुद्दा दायर गर्ने तयारी भइरहेको सन्दीप निकटस्थ स्रोतले जनाएको छ ।
