काठमाडौँ । नेकपा(माओवादी केन्द्र)का प्रमुख सचेतक हितराज पाण्डेले अर्थतन्त्रलाई गतिशील बनाउन उत्पादन वृद्धिमा जोड दिनुपर्ने बताउनुभएको छ ।
शुक्रवार प्रतिनिधि सभा बैठकमा विशेष समयमा बोल्दै प्रमुख सचेतक पाण्डेले देशको आर्थिक अवस्थालाई अझ गतिशील बनाउनुपर्ने बताउनुभएको छ । उहाँले अर्थतन्त्रलाई गतिशील बनाउन उत्पादन वृद्धिमा जोड दिनुपर्ने बताउनु भयो । उहाँले प्राकृतिक स्रोत, साधनहरुको सदुपयोगमा पनि ध्यान दिनुपर्ने बताउनु भयो । त्यस्तै उहाँले संघीयताको कार्यान्वयनका लागि तिनै तहका सरकारका बिचमा समन्वय र सहकार्य आवश्यक रहेको बताउनु भयो । यसको निम्ति संघीय सरकारले पहलकदमी लिनुपर्ने बताउनु भयो ।
उहाँले भन्नुभयो – ‘देशको आर्थिक जो अवस्था छ, त्यसलाई अझ गतिशील बनाउनुपर्ने छ । अर्थतन्त्रलाई गतिशील बनाउनको लागि हामीले उत्पादन वृद्धिमा नै जोड गर्नुपर्ने हो । हाम्रा प्राकृतिक स्रोत, साधनहरुको सदुपयोगमा नै हामीले ध्यान दिनुपर्ने हो । सरकार यतातर्फ विशेष रुपमा लागोस् । संघीयताको दृढ कार्यान्वयनका लागि तिनवटै सरकारका बिच समन्वय, सहकार्य आवश्यक छ । यसका लागि संघीय सरकारको पहलकदमी आवश्यक छ । यसमा संघीय संसदको पनि भुमिका छ । कानून निर्माण लगायतका विषयवस्तुमा हामी सबैले आत्मसमिक्षा गर्दै अगाडी बढौँ ।’
उहाँले संघीयताको कार्यान्वयनमा संघीय संसदको पनि भुमिका हुने भन्दै आवश्यक कानून निर्माणका विषयमा आत्मसमिक्षा गर्नुपर्ने बताउनु भयो ।
