काठमाडौँ: मध्यराति (गएराति) प्रधानमन्त्री बालेन्द्र शाहले लेखेको फेसबुक स्टाटसको चर्चा चलिरहेको छ यतिबेला । सो स्टाटसमा उनले आफू एक्लै परेको वाक्यको अझ धेरै चर्चा छ । उनले ढुक्क हुन जनतालाई आग्रह त गरेकै छन्, अनि आफू एक्लै परेको अवस्था पनि सार्वजनिक गरेका छन् । तर एक्लो कसरी र कोकसबाट परेको हो भन्ने परिस्थिति भने खुलाएका छैनन् । उनले नउठाए पनि मानिसहरुले पार्टीबाट एक्लिदै गएको अवस्थाको अनुमान भने गरेकै छन् । किनभने पछिल्लो समय सरकार र पार्टीबीच सुनिँदो र जानिँदोगरी विवादहरु उत्पन्न भएको नागरिकले स्पष्टसँगै देखेका छन् ।
त्यसो त उनको यो स्टाटस हिजो र आजसम्म ढिलोचाँडो अपेक्षित नै थियो । किनभने हिजोमात्र सत्तारुढ दल रास्वपकै सांसदहरुले आफ्ना सरकार विरुद्ध सक्नेसम्मको उछितो काडेका थिए । यहाँसम्म कि सांसद मात्र नभएर रास्वपा पार्टीका एकजना जिम्मेवार नेता मनिष झाले त प्रधानमन्त्रीलाई कालो चस्मा उतारेर देशको वास्तविक तस्बिर हेर्न र मनन् गर्न चुनौती नै दिएका थिए । उनको भनाईको आसय थियो कि सरकार हिजोका बाचाबाट च्युत भएको र जनताले अब पत्याउन छोडेकाले जतिसक्दो चाँडै प्रधानमन्त्रीले कालो चस्मा उतारेर हेर्नुपर्नेछ ।
उनीमात्र नभएर झण्डै दर्जनको हाराहारीका सत्तापक्षका सांसदहरुले नै हिजो सरकारी रवैयाको विरोध गरेका थिए । प्रधानमन्त्री शाह आफ्नो आलोचना खासै रुचाउँदैनन् । त्यसैले प्रधानमन्त्रीबाट त्यसको ओठे जवाफ अपेक्षित नै थियो । र, अनुमान फेसबुकबाट आउँछ भन्ने नै थियो । किनभने उनको भडाँसा पोख्ने भाँडो अहिलेसम्म त्यही नै हो । हिजोको प्रतिक्रिया त्यही हो । यसैमार्फत् ढिलै भए पनि काम हुन्छ, आत्तिनु पर्दैन भन्ने ढाडस जनतालाई दिने प्रयत्न गरे । अनि हिजो आफू एक्लै रहेको अहिले पनि एक्लै नै परेको भन्ने अभिव्यक्ति पार्टीप्रतिको घुर्की हो ।
तर संसदको जावाफ चाहिँ प्रधानमन्त्रीले फेसबुकबाट दिएका छन् । उनी न नियमित संसद जान्छन् र नत आफैँले संसदमा पेश गर्नुपर्ने प्रस्तावका लागि नै त्यहाँ पुग्छन् । तर संसदमा उठेका प्रश्न भने ख्याल गर्छन्, त्यो पनि आफूँ विरुद्धको आलोचना । आलोचना उनलाई स्वस्थ पनि मन पर्दैन । त्यसैले संसदमा जुन सांसदले आफ्नो विरोध गर्छ त्यसको प्रतिवादनमा उत्रिन चाहन्छन् । अनि रास्वपाका सांसदले विरोध गरे भने पार्टी सभापतिलाई फोन गरेर जानकारी गराउँछन् । अनि सभामुखलाई संसद बैठक अन्त्य गरौँ भन्छन् ।
तर रास्वपा सभापति र सभामुखले भने संसद बैठक अहिले नै बन्द गर्न रुचाएका छैनन् । किनभने संसद बैठक अन्त्य गरेपछि प्रधानमन्त्रीले के कस्ता अध्यादेश ल्याउने हुन् भन्ने कुराको कुनै ठेगान नभएको सभापति रवि लामिछाने र सभामुख डोलप्रसाद अर्याल ढुक्क छैनन् । यसरी अहिले पनि धिरे धिरे चलिरहेको छ संसद र जारी छन् सरकार र पार्टीका जुहारी ।
यता प्रधानमन्त्रीले संसदको जवाफ फेसबुकबाट दिने गरेका छन् भने उता जनता सरकार बनेको चार महिनामै सेवाका लागि लाइन बस्न बाध्य भएका छन् । रास्वपाको चुनावी घोषणपत्रमा लेखिएको छ अब सेवा लिन लाइन होइन अनलाइन् । वर्तमान सरकार बनेपछि बालेन्द्र सरकारले त्यसको अभ्यासन नगरेको पनि होइन । यतिसम्म कि सवारी चालक अनुमति पत्र र राहादानी नै सरकारले हुलाकमार्फत् घरघर पठाउन पनि थाल्यो । केही सेवाग्राहीले त्यसको तस्बिर खिचेर फेसबुकमा हाले र सरकारले व्यापक मात्रामा प्रचार पनि गर्यो ।
तर, त्यो अवस्था नयाँ जोगीले धेरै खरानी धसेजस्तै भयो । चार महिनामै सरकारको अनलाइन सेवाको ढोँग उत्रिसकेको छ । हिजो अनलाइन भनिएको सेवा अब लाइनमै गएको छ । जनताले लाइन लागेरै सेवा लिन बाध्य भएका छन् । हिजो अनलाइन सेवा भनेर, घरघरमै पुर्याएर फोटो खिचेर प्रचार गराइएको राहादानी पाउन अहिले जाता दिनभर लाइन बस्नुपर्ने अवस्था छ । हिजो सवारी अनुमति पत्र छपाइ दिनमै लाखौँ भइरहेको भनेर सञ्चार मन्त्री विक्रम तिमिल्सनाले गरेको प्रचार पनि यति चाँडै खुइलिइसकेको छ । जनताले लाइसेन्सका लागि बसेको लाइनले हिजो उनको सस्तो प्रचारको खिल्ली उडाएको छ ।
यता ग्यास सिलिन्डको कथा त सबैमा छर्लङ्ग नै छ । जनताले एक सिलिन्डर ग्यासका लागि दिनभर लाइन बस्नुपर्ने अवस्था छ । पेट्रोलियम पदार्थको मूल्य उता बढ्दा बढेको छ, तर उता घट्दा घटेको छैन । बजार महंगीको त झन् कुरै भएन । महंगी नियन्त्रणको कुनै योजना नै सरकारले अघि सारेको देखिएको छैन । सरकारले कर्मचारीको तलब १० प्रतिशत बढाएको प्रचार गरायो तर बजार महंगी ३० प्रतिशतले बढेको देखेको छैन । कुनै आयोजनाका निर्माण व्यवसायीको फोन सम्पर्क हुन नसक्दा प्रहरी लगाएर ल्याउने सरकारले दिनदहाडै महंगी बढाउने कालाबजारियाहरुलाई भने छुन पनि सकेको छैन ।
अझ भित्रभित्रै लुकेको खतराको रहस्योद्घाटन हिजो मनिष झाले नै संसदमा गरेका छन् । उनले भनेका थिए— मधेशको साम्प्रदायिकताको आगो निभेको मात्र हो, दाउरा निभेका छैनन् । यता सरकार र उसका काम कारबाहीप्रतिका जनताका आक्रोसहरु यही रफ्तारमा बढ्दै जाँदा उता परिस्थितिको फाइदा लिन कुरेर बसिरहेका कोहीले ननिभेका दाउराका ठुटामा आगो झोसिदिए भने देशको हालत के होला ?
वरिष्ठ अधिवक्ता भीमार्जुज आचार्य सत्तारूढ दलका नेता र सांसद्हरूले सरकारका कामका बारेमा अब प्रश्नहरू गर्न थाल्नु सकारात्मक भएको बताउनु हुन्छ । आचार्यले भन्नुभयो –सत्तारूढ दलका नेता र सांसद्हरूले सरकारका कामका बारेमा अब प्रश्नहरू गर्न थाल्नु भएछ । खुशी लाग्यो । तर,प्रश्न सरकारप्रति मात्र होइन । तपाईप्रति झनै गम्भीर छ । आफैले जन्माएको सरकारलाई संसद्, संविधान, दल, जनता कसैप्रति पनि जवाफदेही नभएको देख्न थाल्नु भा हो र यसका कामकारबाहीमा साच्चै असन्तुष्ट हुनु भा हो भने यसलाई बदल्ने तागत् त तपाईसंगै छ, किन त्यसो गर्न सक्नु हुन्न ? सत्ता पक्ष र प्रत्तिपक्ष दुबै आफै हुने तमासा किन देखाउनु हुन्छ ? यस्तो कार्यले हाम्रा पद्दति र मूल्यलाई झनै कमजोर बनाउॅंछ ।
त्यसैले प्रधानमन्त्रीजी, अब कालो चस्मा मात्र खोलेर पुग्दैन, मुख नै खोल्नुहोस् । फेसबुकमा मात्र लखेर अब पुग्दैन, आफैँ बोल्नुहोस् । र, बिग्रन लागेको देशको परिस्थितिलाई राज्यकै काबुमा राख्ने प्रयत्न थाल्नुहोस् ।
