काठमाण्डौ । हिन्दुहरुको महान चाड वडादशैंको पुर्वसन्ध्यामा स्वयम्भूमा रहेको द एक्सेल्सियर स्कुलका बिद्यार्थीहरुले दुर्गा नृत्य र दशैं झाँकी प्रस्तुत गर्नुका साथै दुर्गा भगवतीले महिषासुर राक्षसको वध गरेको प्रतिकात्मक नाटक प्रस्तुत गरेका छन् ।
बिद्यार्थीहरुलेवडादशैंको विजया दशमीभन्दा अगाडिका नौ रात्री अर्थात नवरात्रीमा पुजा गरिने ९ जना देवीहरुको प्रतीकस्वरुप नौ जना छात्रालाई ‘भगवतीको प्रतीक’ बनाई उनीहरुबाट नृत्य गराइएको थियो ।
त्यसैगरि बिद्यार्थीहरुले विभिन्न देवीहरुको रुपमा आफुलाई प्रस्तुत गरेका थिए भने आमा, शिक्षिका, गृहिणी, लगायत विभिन्न भूमिकाको प्रतिकारत्मक रुपमा आफुरुलाई चित्रण गरेका थिए । विद्यार्थीहरुमा दशैँको महत्वबारे जानकारी गराउन कार्यक्रमको आयोजना गरिएको बिद्यालयले जनाएको छ ।
अहिले सामाजिक सञ्जालमा रमाइरहने विद्यार्थीहरुलाई दशैँजस्तो चाडपर्वको मौलिकता कसरी कायम गर्न सकिन्छ र कसरी रमाइलो गरी दशैँ मनाउन सकिन्छ भन्ने उद्देश्यले व्यावहारिक ज्ञान दिइएको प्रधानाध्यापक प्रशान्त रजकले जानकारी दिनुभयो ।
आफ्नो धर्म, कला र संस्कृतिबारे विद्यार्थीलाई रुचि जगाउन पनि यस्ता व्यावहारिक ज्ञान विद्यार्थीहरुलाई दिनुपर्ने रजकले बताउनुभयो ।
नवरात्रीको नौ दिनमा शैलपुत्री, ब्रम्हचारिणी, चन्द्रघण्टा, कुस्माण्डा, स्कन्दमाता, कात्यायनी, कालरात्री, महागौरी र सिद्धिदात्रीको पुजा आराधना गरि दशौं दिनमा दुर्गा भगवतीले महिषासुर राक्षसलाई वध गरेको खुसीयालीमा टिका र जमरा लगाई विजया दशमी मनाउने चलन छ ।
