एजेन्सी । क्रिकेटको सबैभन्दा ठूलो लडाई अक्टोबर ५ बाट सुरु हुँदैछ । १२ वर्षपछि भारतले ५० ओभरको विश्वकप आयोजना गर्ने तयारी गरेको छ । आफ्नै भूमिमा प्रतियोगिता आयोजना हुने कारण भारतीय टोलीलाई उपाधिको प्रबल दावेदार पनि मानिन्छ ।
यसैबीच भारतीय पूर्व क्रिकेटर इरफान पठानले विश्वकप २०२३ को उपाधिका लागि खेलिने दुई टोलीको नाम तोकेका छन् ।
स्टार स्पोर्ट्सको एक कार्यक्रममा कुरा गर्दै इरफान पठानले भने कि उनका अनुसार विश्वकपको फाइनल खेल भारत र दक्षिण अफ्रिकाबीच हुनेछ । इरफानले इङ्ल्यान्ड, अष्ट्रेलिया वा पाकिस्तानजस्ता ठूला टोलीमा आफ्नो बाजी लगाएनन् ।
पछिल्लो समय भारतीय टोलीको प्रदर्शन निकै उत्कृष्ट रहेको छ । घरेलु मैदानमा भएको तीन खेलको एकदिवसीय सिरिजमा भारतले अस्ट्रेलियालाई २–१ ले हराएको थियो ।
रोहित शर्माको कप्तानीमा भारतले हालै एसिया कपको उपाधि समेत जितेको थियो । भारतीय टोलीको प्रदर्शन बलियो रह्यो र टोलीले फाइनल खेलमा श्रीलंकालाई १० विकेटले पराजित गरेको थियो ।
