काठमाडौं । जिल्ला प्रशासन कार्यालय, काठमाडौंले कोभिड–१९ संक्रमणको पछिल्लो अवस्था र सम्भावित प्रभावलाई मूल्यांकन गरेर जनजीवनलाई सहज बनाइएको बताएको छ ।
जिल्ला प्रशासन कार्यालय काठमाडौंका सहायक प्रमुख जिल्ला अधिकारी उमाकान्त अधिकारीले कोभिड–१९ संक्रमणको पछिल्लो अवस्था र सम्भावित प्रभावलाई मूल्यांकन गरेर जनजीवनलाई सहज बनाइएको बताउनु भएको हो ।
उहाँले केही प्रतिबन्धात्मक व्यवस्थासहित जिल्ला प्रशासन कार्यालयले आईतबार नयाँ आदेश जारी गरेको र सो आदेशमा आगामी फागुन १ गतेबाट शैक्षिक संस्थाहरु सञ्चालन गर्न पाउने र १२ वर्ष भन्दामाथिका विद्यार्थीका हकमा नियमित रुपमा र १२ वर्ष पूरा नभएका विद्यार्थीका हकमा विद्यार्थी संख्यासमेत विचार गरेर सम्बन्धित स्थानीय तहसँगको समन्वयमा विद्यालय व्यवस्थापनले आलोपालो वा सिफ्ट प्रणालीमा कक्षा सञ्चालनको व्यवस्था मिलाउने गरी सञ्चालन गर्नुपर्ने बताउनु भयो ।
त्यस्तै सबै किसिमका परीक्षाहरु विशेषतः स्वास्थ्यका मापदण्ड पूर्ण पालना गरी जेट आकारमा सिट व्यवस्थापन गर्ने र आगामी फागुन १ गतेदेखि परीक्षाहरु सञ्चालन गर्न पाउने पनि जानकारी दिनुभयो । सहायक प्रमुख जिल्ला अधिकारी अधिकारीले आगामी फागुन १ गतेबाट दोहोरी, नाचघर, क्लव लगायतका रात्रीकालीन व्यवसाय, सिनेमा हल, हेल्थ क्लव, जिम खाना, स्वीमिङ पुल, फुटसल जस्ता सेवाहरु जनस्वास्थ्य र सुरक्षाको मापदण्ड पालना गर्ने गरी राति १० बजेसम्म सञ्चालन गर्न सक्ने पनि बताउनु भयो ।
सहायक प्रमुख जिल्ला अधिकारी अधिकारीले भन्नुभयो, ‘कोभिड १९ संक्रमणको पछिल्लो अवस्था र त्यसको विश्लेषण सम्भावित प्रभाव समेतलाई मूल्यांकन गर्दै, समीक्षा गर्दै विभिन्न मितिमा यस कार्यालयबाट केही प्रतिवन्धात्मक व्यवस्थाहरु सहित आदेश जारी भएको थियो र हिजो मात्रै थप नयाँ आदेश जारी भएको छ । यसले कोभिडको पछिल्लो संक्रमणको अवस्था र त्यसले पार्ने जोखिम, त्यसको पछिल्लो ट्रेनसमेतका आधारमा अहिले केही गतिविधिहरुलाई थोरै लचिलो बनाइएको छ ।
त्यसअन्तर्गत विशेषतः आगामी फागुन १ गतेबाट विद्यालयहरु सञ्चालन गर्ने, विश्वविद्यालय, कलेज, ट्यूसन सेन्टर, तालिम वा अन्य प्रकारका शैक्षिक क्रियाकलापहरु, जनस्वास्थ्यका मापदण्ड पालना गरी फगुन १ गतेदेखि सञ्चलन गर्ने, विद्यालय सञ्चालन गर्दा विशेषतः १२ वर्ष भन्दा माथिका विद्यार्थीका हकमा नियमित रुपमा र १२ वर्ष पूरा नभएका विद्यार्थीका हकमा विद्यार्थी संख्यासमेत विचार गरेर सम्बन्धित स्थानीय तहसँगको समन्वयमा विद्यालय व्यवस्थापनले आलोपालो वा सिफ्ट प्रणालीमा कक्षा सञ्चालनको व्यवस्था मिलाउने भन्ने छ । सबै किसिमका परीक्षाहरु विशेषतः स्वास्थ्यका मापदण्ड पूर्ण पालना गरी जेड आकारमा सिट व्यवस्थापन गर्ने र आगामी फागुन १ गतेदेखि परीक्षाहरु सञ्चालन गर्ने । दोहोरी, नाचघर, क्लव लगायतका रात्रीकालीन व्यवसाय, सिनेमा हल, हेल्थ क्लव, जिम खाना, स्वीमिङ पुल, फुटसल जस्ता सेवाहरु जनस्वास्थ्य र सुरक्षाको मापदण्ड पालना गर्ने गरी राती १० बजे भन्दा माथि नजाने गरी फागुन १ गतेबाट सञ्चालन गर्न सक्ने ।
पार्टी प्यालेसमा विशेषतः पूर्ण खोप लगाएका १०० जनामा नबढ्ने गरी मात्र उपस्थित रहने व्यवस्था गरेर विवाह, व्रतबन्ध, न्वारन, पास्नी जस्ता धार्मिक, सांस्कृतिक तथा सामाजिक कार्यक्रमहरु सञ्चालन गर्ने व्यवस्था भएको छ । सवारी साधनमा जोर बिजोर लागू गरिएको थियो, त्यो आजबाट हटाइएको छ । खेलकुदका कार्यक्रम सञ्चालन गर्दा एक पटकमा कुल दर्शक क्षमताको ५० प्रतिशत भन्दा बढी नहुने गरी पूर्ण खोप लगाएका दर्शक उपस्थित गराउने । जनस्वास्थ्यको मापदण्ड एवं सम्बन्धित खेलको अन्तर्राष्ट्रिय प्रोटोकल पालना गरी फागुन १ गतेदेखि सञ्चालन गर्न पाउने । सार्वजनिक सेवा लिन सबैले खोप कार्ड लिनुपर्ने यो निरन्तर छ । यसको प्रतिक्रिया पनि राम्रो छ । यो आदेशको प्रभावकारी कार्यान्वयनको लागि हामी आम नागरिकहरुलाई विशेष अपिल गर्दछौँ । जोखिमलाई मध्यनजर गरेर हामीले यी आदेशहरुको कार्यान्वयन र अनुगमन पनि गरिरहेका छौँ । आगामी दिनमा परिस्थितिलाई नजिकबाट अनुगन हुन्छ, विश्लेषण हुन्छ । त्यसको प्रभावको मूल्यांकन हुन्छ र सोही बमोजिम आदेशहरु परिमार्जन हुने सम्भावना हुन्छ ।’
सहायक प्रमुख जिल्ला अधिकारी अधिकारीले धार्मिक, सामाजिक र सांस्कृतिक कार्यक्रम गर्दा बढीमा १०० जना उपस्थित हुन सक्ने र उपस्थितले खोपको पूर्ण मात्रा लगाएको हुनुपर्ने बताउनु भयो । उहाँले कोरोनाको जोखिमलाई मध्यनजर गर्दै जिल्ला प्रशासन कार्यालयले दिएको निर्देशनको प्रभावकारी कार्यान्वयन अनुगमन पनि गरिने स्पष्ट पार्नुभयो । जिल्ला प्रशासनले खेलकुदका कार्यक्रम सञ्चालन गर्दा एक पटकमा कुल दर्शक क्षमताको ५० प्रतिशत भन्दा बढी नहुने गरी पूर्ण खोप लगाएका दर्शक उपस्थित हुनसक्ने र सार्वजनिक सेवा लिनेहरुले कोरोनाको पूर्ण मात्रा खोप लगाइसकेको हुनुपर्ने पनि निर्देशनमा उल्लेख गरेको छ ।
