काठमाडौं । स्वास्थ्य तथा खाद्य स्वच्छता मन्त्रालयले देशभरका ३९ वटा रक्तसञ्चार केन्द्रलाई आफ्नो केन्द्रमा मौज्दात रहेको रगत तथा रक्त तत्वको विवरण रगत अनुगमन तथा रक्तदाता व्यवस्थापन प्रणालीमा अनिवार्य रूपमा प्रविष्टि तथा अद्यावधिक गर्न निर्देशन दिएको छ ।
राष्ट्रिय जनस्वास्थ्य प्रयोगशालाबाट सञ्चालन हुँदै आएको उक्त प्रणालीमा आबद्ध भई सञ्चालनसम्बन्धी तालिम सम्पन्न गरेका ३९ वटा रक्तसञ्चार केन्द्रले आफ्नो केन्द्रमा उपलब्ध रगत तथा रक्त तत्वको विवरण वास्तविक समयमै प्रविष्टि तथा नियमित रूपमा अद्यावधिक गर्नुपर्ने मन्त्रालयले जनाएको छ ।
मन्त्रालयका अनुसार प्रणालीमा प्रविष्ट गरिएको रगत तथा रक्त तत्वको विवरण मन्त्रालयको वेबसाइट र नागरिक एपमार्फत समेत सर्वसाधारणका लागि उपलब्ध हुनेछ । यसबाट नागरिकले आफूलाई आवश्यक पर्ने रगत वा रक्त तत्व कुन रक्तसञ्चार केन्द्रमा उपलब्ध छ र त्यसको मौज्दात कति छ भन्ने जानकारी सहज रूपमा प्राप्त गर्न सक्नेछन् ।
मन्त्रालयले केही रक्तसञ्चार केन्द्रले आफ्नो केन्द्रमा मौज्दात रहेको रगत तथा रक्त तत्वको सही विवरण प्रणालीमा प्रविष्टि तथा अद्यावधिक नगरेको गुनासो प्राप्त भएको जनाएको छ । त्यसपछि मन्त्रालयले तालिम सम्पन्न गरेका सबै ३९ वटा रक्तसञ्चार केन्द्रलाई तत्काल आफ्नो केन्द्रमा उपलब्ध रगत तथा रक्त तत्वको मौज्दात परिमाण, प्रकार तथा अन्य आवश्यक विवरण प्रविष्टि गरी नियमित रूपमा अद्यावधिक गर्न आग्रह गरेको हो ।
सम्बन्धित रक्तसञ्चार केन्द्रका प्रमुख तथा जिम्मेवार कर्मचारीले प्रणालीमा प्रविष्ट गरिने विवरणको शुद्धता, पूर्णता र समयमै अद्यावधिक हुने सुनिश्चित गर्नुपर्ने मन्त्रालयले जनाएको छ । साथै, रगत तथा रक्त तत्वको विवरण प्रविष्टि र अद्यावधिक गर्ने कार्यलाई नियमित संस्थागत जिम्मेवारीका रूपमा कार्यान्वयन गर्न सबै सम्बन्धित निकायलाई निर्देशन दिइएको छ ।
मन्त्रालयका अनुसार यस प्रणालीमार्फत रगतको उपलब्धतासम्बन्धी सूचना सहज रूपमा प्राप्त हुने भएकाले रक्तसञ्चार सेवा थप प्रभावकारी, पारदर्शी र नागरिकमैत्री बनाउन सहयोग पुग्ने अपेक्षा गरिएको छ ।
आवश्यक सहजीकरण तथा प्राविधिक सहयोगका लागि राष्ट्रिय जनस्वास्थ्य प्रयोगशाला, टेकुमा सम्पर्क गर्न सकिने मन्त्रालयले जनाएको छ । प्रयोगशालाको फोन नम्बर ०१–५३५२४२१ रहेको छ ।
