काठमाडौँ । एसिया कप क्रिकेट प्रतियोगिताअन्तर्गत भारतसँगको खेलमा छक्का प्रहार गरेका दुई नेपाली खेलाडीलाई पुरस्कार प्रदान गरिएको छ ।
इन्स्पायर नोबल फाउन्डेशनले एसिया कप–२०२३ अन्तर्गत भारतसँगको खेलमा छक्का प्रहार गर्ने प्रतिखेलाडीलाई एक लाख रुपैयाँ प्रदान गर्ने घोषणा गरेको थियो ।
जसअनुसार खेलकुद पत्रकार मञ्चको रोहबरमा आज बिहीवार आयोजित कार्यक्रममा भारतसँगको खेलमा छक्का प्रहार गरेका नेपालका कुशल भुर्तेल र सोमपाल कामीलाई जनही एक–एक लाख रुपैयाँ प्रदान गरिएको हो ।
भारतसँगको खेलमा कुशल र सोमपालले समान दुई छक्का प्रहार गरेका थिए । कुशल र सोमपाललाई फाउन्डेशनको तर्फबाट सुशील रेग्मीले चेक हस्तान्तरण गरे । फाउन्डेशनले भारतसँगको खेलमा छक्का प्रहार गर्ने तथा विकेट लिने प्रत्येक खेलाडीलाई नगदबाट पुरस्कृत गर्ने घोषणा गरेको थियो ।
इन्स्पायर नोबेल फाउन्डेसन अमेरिकामा रहेका गैरआवासीय नेपालीले खोलेको संस्था हो । पुरस्कृत भएपछि दुवै खेलाडीले यसबाट आफूलाई थप हौसला मिलेको बताउँदै फाउन्डेशनलाई धन्यवाद दिए ।
