एजेन्सी । अक्किनेनी नागार्जुनको जन्म आजभन्दा ठीक ६३ वर्षअघि तेलुगु फिल्म स्टार अक्किनेनी नागेश्वर रावको घरमा भएको थियो । बुबाले जस्तै उनले पनि चलचित्रमा काम गर्ने निर्णय गरे ।
नागार्जुनले हिन्दी र साउथ गरी करिब १०० फिल्ममा काम गरिसकेका छन् । नागार्जुनले सन् १९८६ मा साउथ फिल्म ‘विक्रम’बाट आफ्नो अभिनय करियर सुरु गरेका थिए । साथै, फिल्म ‘शिव’बाट बलिउडमा आफ्नो यात्रा सुरु गरेका थिए ।
आज उनले ६३ औं जन्मदिन मनाउँदै गर्दा एक किस्साबारे यहाँ चर्चा गरौं ।
फिल्ममा अभिनयका कारण नागार्जुनको निकै फ्यान फलोइङ छ । उनका फ्यानहरूको क्रेज यस्तो छ कि एक डाई हार्ट फ्यानले सन् १९९७ मा आएको फिल्म ‘अन्नमय्य’बाट प्रेरित भएर भव्य अन्नमाचार्य मन्दिर बनाइदिए । यो मन्दिर आन्ध्र प्रदेशको गुंटुरमा बस्ने अक्किनेनी नागार्जुनका फ्यान सुधाकर स्वामीले बनाएका हुन् ।
उनले सन् १९९७ मा फिल्म ‘अन्नमय्य’ हेरेपछि यस मन्दिरको शिलान्यास गरेका थिए । यो मन्दिर २२ वर्षको लामो प्रतिक्षापछि सम्पन्न भएको हो । यस मन्दिर निर्माणमा सुधाकर स्वामीका साथीहरूले पनि सहयोग गरेका थिए ।
नागार्जुनका फ्यानले मन्दिरका लागि १ करोड रुपैयाँ संकलन गरेका थिए । यस मन्दिरको नाम श्री अन्नमय्य स्वामी मन्दिर हो ।
