काठमाडौँ । नेकपा (एमाले)का अध्यक्ष केपी शर्मा ओलीले नेकपा (एकीकृत समाजवादी)का अध्यक्ष माधवकुमार नेपालसँगको तस्बिर सेयर गरेका छन् ।
सामाजिक सञ्जाल फेसबुकमा ओलीले सोमबार बसेको प्रतिनिधिसभा अन्तर्गतको अन्तर्राष्ट्रिय सम्बन्ध र पर्यटन समितिको बैठकका तीन तस्बिर सेयर गरेका हुन् । तस्बिरमा दुवैजना प्रफुल्लित मुद्रामा देखिन्छन् ।
‘आज बसेको प्रतिनिधिसभा अन्तर्राष्ट्रिय सम्बन्ध र पर्यटन समितिको बैठकका तीन तस्बिर, शुभ सन्ध्या’, सोमबार साँझ पोस्ट गर्दै उनले तस्बिरको क्याप्सनमा लेखेका छन् ।
एमाले विभाजन भई नेकपा एकीकृत समाजवादी गठन भएपछि ओली र नेपालबीच सम्बन्ध चिसिएको थियो । सार्वजनिक कार्यक्रममा एक–अर्काले आरोप प्रत्यारोप लगाउँदै आएका छन् ।
