काठमाडौँ । प्रमुख प्रतिपक्षी दल नेकपा (एमाले) का उपमहासचिव विष्णु रिमालले बरामद अवैध सुन प्रकरणमा छानबिन आयोग गठन गर्ने सहमति जस्तो संवेदनशील विषयमा ‘ठट्टा’ नगर्न आग्रह गर्नुभएको छ ।
अवैध सुन बरामद प्रकरणमा छानबिन आयोग बन्ने सहमति भएको मसी सुक्न नपाउँदै गठबन्धनकै ‘प्रभावशाली’ भनिने नेताले ‘सहमति विपक्षलाई छक्याउने रंगीन टालो’ भनी दिएको टिप्पणीप्रति उपमहासचिव रिमालले सामाजिक सञ्जाल फेसबुकमार्फत उक्त आग्रह गर्नुभएको हो । “एयरपोर्टमा कार्यरत सबै निकायले नसमातेको क्विन्टल सुन राजश्व अनुसन्धान विभागले समाउनु, बिजुली चुरोटको नाममा ल्याएको सुन पहिले छक्याउनु र लिलाम गरी ‘माल’ किन्न प्रधानमन्त्रीको पार्टीका उपाध्यक्षको सहजीकरणमा परिवारका मानिस तम्सिनु, सुन पो रहेछ भन्ने सूचना लिक हुँदानहुँदै समातिएको मध्ये केही सुन गायब पारिनु … र यी सबै गडबडीको साँच्चिकै छानबिन गर्न आयोगको प्रस्ताव गर्दा सत्ताधारीकै सांसद उफारी संसद अवरोध हुनु संयोग मात्र थिएन”, उहाँले भन्नुभएको छ ।
छानबिन आयोग बन्ने सहमतिप्रति गठबन्धनका नेताले गरेको टिप्पणीप्रति उपमहासचिव रिमालले भन्नुभयो, “साथीहरुको नियतमा कहीँ न कहीँ खोट छ। अहिले यत्ति चाँहि भनौँ– मित्रहरु, यस्तो संवेदनशील विषयमा “ठट्टा” नगरौँ, महँगो पर्छ है ?”
