काठमाडौं । राष्ट्रिय प्रजातन्त्र पार्टी (राप्रपा)का महामन्त्री शरदराज पाठकले पार्टीको कार्यशैलीप्रति असन्तुष्टि जनाउँदै पार्टीका सबै जिम्मेवारी परित्याग गरेका छन् ।
पाठकले आइतबार सामाजिक सञ्जालमार्फत विज्ञप्ति जारी गर्दै महामन्त्रीसहित पार्टीका सबै पद तथा पार्टी सदस्यसमेत नरहने घोषणा गरेका हुन् । उनी करिब चार वर्षदेखि राप्रपाको महामन्त्रीको जिम्मेवारीमा थिए ।
पार्टीको विचारधारा र व्यवहारबीच चरम विरोधाभास रहेको भन्दै पाठकले नेतृत्वको कार्यशैलीप्रति असन्तुष्टि जनाएका छन् । ‘भ्रष्टाचार गरेर खानु आमाको रगत खाएसरह हो’ भन्ने कठोर नारालाई मूलमन्त्र मान्ने बताउने पार्टीमा त्यसअनुरूपको व्यावहारिक प्रतिबद्धता र पारदर्शिताको ठूलो अभाव देखिएको उनको भनाइ छ ।
पार्टीको केन्द्रीय नेतृत्व तहमा स्थापनाकालदेखिकै आन्तरिक बेमेल र गुटगत स्वार्थका कारण तिक्ततापूर्ण संघर्ष बढ्दै गएको पनि पाठकले बताएका छन् । यस्तो अवस्थाले नयाँ पुस्ताका इमानदार, शिक्षित र सचेत युवालाई पार्टीमा आकर्षित गर्न नसकिएको उनको आरोप छ ।
‘म लगायत नयाँ जोडिएका साथीहरूले सो अवस्थामा परिवर्तन ल्याउन सक्ने कुनै सम्भावना देखिँदैन । यसमा मेरा आफ्ना कमजोरीहरू पनि होलान्,’ पाठकले विज्ञप्तिमा भनेका छन् ।
यद्यपि राप्रपाका तल्लो तहमा रहेका नेता तथा कार्यकर्ताको निष्ठा र प्रतिबद्धता भने अतुलनीय र प्रेरणादायी रहेको उनले उल्लेख गरेका छन् । उनीहरूप्रति आफू सधैँ नतमस्तक रहने पाठकले बताएका छन् ।पाठक रविन्द्र मिश्रसँगै राप्रपामा प्रवेश गरेका थिए । मिश्रले पनि पछिल्लो निर्वाचनलगत्तै राप्रपा छाडेका थिए ।
