एजेन्सी । साउदी क्लब अल नासरले एसियाली च्याम्पियन्स लिगको प्लेअफमा रोमाञ्चक जित निकाल्दै छनोटमा स्थान बनाएको छ ।
हारतर्फ उन्मुख टोलील खेलको अन्तिम ९ मिनेटमा ३ गोल गर्दै शबाब अल अहलीलाई ४–२ ले पराजित गर्यो । च्याम्पियन्स लिगमा छनोटका लागि प्लेअफमा अल नासर ८७ औं मिनेटसम्म २–१ ले पछाडी थियो । तर अन्तिम ९ मिनेटमा अल नासरले ३ गोल थप्दै यस सिजनको च्याम्पियन्स लिगमा स्थान पक्का गरेको हो ।
अल नासर पछिल्लो तीन वर्षमा पहिलो पटक एएफसी च्याम्पियन्स लिगको समूह चरणमा प्रवेश गरेको छ । अल–नासरलाई रोमाञ्चक जित दिलाउन एन्डरसन तालिस्काले खेलको ११ औं र ९०+५ गरी दुई गोल गरे भने सुल्तान अल–घानामले ८७ औं र मार्सेलो ब्रोजोभिचले ९०+७ मिनेटमा गोल गर्दै एक–एक गोल थपे । पराजित शबाब अल अहलीका लागि याह्या अल घासानीले १८ औं र ४५ औं मिनेटमा गरी दुई गोल गरेपनि टोलीलाई जित दिलाउन सकेनन् ।
पराजित अल अहलीले अब दोस्रो श्रेणीको एएफसी प्रतियोगिता, एएफसी कपमा प्रतिस्पर्धा गर्नेछ । एएफसी च्याम्पियन्स लिग र एएफसी कप दुवैको ड्र २४ अगस्टमा मलेसियाको क्वालालम्पुरमा हुनेछ ।
साउदीबाट यसअघि अल इतिहाद, अल फायहा र अल हिलाल च्याम्पियन्स लिगका लागि छनोट भइसकेका छन् । भारतको मुम्बई सिटी फुटबल क्लबले पनि समूह चरणमा स्थान पक्का गरिसकेको छ । प्लेअफबाट अल नासरसहित ८ टोलीको टुंगो लागेसँगै अब अगस्ट २४ मा समूह चरण ड्र हुनेछ ।
