काठमाडौं । जनमत पार्टीका अध्यक्ष डा सीके राउतले किसानहरुको माग पूरा नभए आसन्न स्थानीय तहको निर्वाचनमा अवरोध गर्ने चेतावनी दिएका छन् ।
बुधबार वीरगञ्जमा आयोजना गरिएको पत्रकार सम्मेलनमा उनले स्थानीय निकायको निर्वाचनअघि किसान आन्दोलनको माग पूरा हुनुपर्ने बताए ।
आफ्नो पार्टी निर्वाचन विरोध नभएको स्पष्ट पार्दै उनले आफूहरु पनि निर्वाचनमा सहभागी हुन आतुर रहेको तर सरकारले किसानको माग सम्बोधन गर्ने पहल सुरु गरेको देखिनुपर्ने बताउनुभयो ।
उहाँले किसान आन्दोलनको अर्को चरण फागनु १ गतेदेखि सुरु हुने जानकारी दिनुभयो । डा राउतले अब राजमार्ग केन्द्रीत आन्दोलनलाई ग्रामीण क्षेत्रमा सारिने स्पष्ट गर्नुभयो । मौसम प्रतिकूलताका कारण त्यसो गर्नुपरेको उहाँको भनाइ थियो ।
