एजेन्सी । बलिउडका चर्चित कला निर्देशक नितिन देसाईले बुधबार बिहान आत्महत्या गरेका छन् । उनका म्यानेजरकाका अनुसार मुम्बई नजिकैको कर्जतमा रहेको एनडी स्टुडियोमा बिहान ३:३० बजे झुण्डिएको अवस्थामा देसाई मृत फेला परेका थिए । उनको उमेर ५८ वर्ष थियो । उनी आफ्नो अधिकांश समय यही स्टुडियोमा बिताउने गर्थे ।
प्रहरी स्रोतका अनुसार मंगलबार राति १० बजे देसाई आफ्नो कोठामा गएका थिए । आज बिहान धेरै बेरसम्म बाहिर नआएपछि उनका अंगरक्षक र अन्यले ढोका ढकढकाएका थिए । झ्यालबाट हेर्दा देसाईको शव छतको पंखामा झुण्डिएको अवस्थामा फेला परेको थियो । प्रहरीले शवलाई पोष्टमार्टमका लागि पठाएको छ । यस घटनामा प्रहरीले हालसम्म १० जनाको बयान लिइसकेको छ ।
आत्महत्याका दुईवटा कारण बताइएको छ । एउटा आर्थिक संकट, अर्को चिकित्सा समस्या । यद्यपि यो कुराको पुष्टि भने भएको छैन । महाराष्ट्रका विधायक महेश बालदीले उनी आर्थिक संकटसँग जुधिरहेको बताए । उनले आत्महत्याको कारण यही हुन सक्ने बताए ।
नितिनले सन् १९८७ मा टिभी शो ‘तमस’ बाट आफ्नो करियर सुरु गरेका थिए । उनी एउटै सेटमा १३ दिन १३ रात बसे । एक अन्तर्वार्तामा उनले भनेका थिए, ‘त्यतिबेला उनी १५ मिनेट नुहाउन गएका थिए जसलाई उनले १५ मिनेट खेर गइरहेको महशुस गरेका थिए । उनको कामप्रति कति लगाव थियो भन्ने कुरा यसैबाट प्रस्ट हुन्छ ।
नितिनले फिल्म ‘हम दिल दे चुके सनम’, ‘लगान’, ‘देवदास’, ‘जोधा अकबर’ र ‘प्रेम रतन धन पायो’का लागि सेट डिजाइन गरेका थिए । उनले चार पटक उत्कृष्ट कला निर्देशनको लागि राष्ट्रिय चलचित्र पुरस्कार प्राप्त गरे । उनले पछिल्लो पटक ‘पानीपत’ फिल्ममा काम गरेका थिए ।
