काठमाडौँ। प्रहरीले अवैध लागुऔषधसहित मुलुकका विभिन्न स्थानबाट १६ जना पक्राउलाई पक्राउ गरेको छ ।
विभिन्न जिल्लाबाट खटिएको प्रहरीको टोलीले काठमाडौँ, सिराहा, कैलाली, बाँके, धनुषा, कञ्चनपुर र पर्साबाट शनिबार र आज गरी १६ जना पक्राउ गरी सार्वजनिक गरेको हो ।
काठमाडौँ महानगरपालिका-९ बत्तिसपुतलीबाट अवैध लागुऔषध गाँजा करिब ६६० ग्रामसहित कामपा-८ पशुपति क्षेत्रमा बस्ने सिन्धुपाल्चोक घर भएका ४२ वर्षीय भक्तबहादुर तामाङलाई प्रहरीले पक्राउ गरेको छ ।
काठमाडौँको चन्द्रागिरी नगरपालिका-८ धास्की डेरा गरी बस्ने चितवन घर भएका ३२ वर्षीय सुगम मैनालीसहित पाँच जना, सिराहाको गोलबजार नगरपालिका-८ पुरानो चौहर्वाबाट ब्राउनसुगर जस्तो देखिने पदार्थ चार ग्राम ५६ मिलिग्रामसहित २३ वर्षीय जयकुमार नायक पक्राउ परेका केन्द्रीय प्रहरी समाचार कक्षले जनाएको छ ।
कैलालीको घोडाघोडी नगरपालिका-२ नयाँबजारबाट एक, धनगढी उपमहानगरपालिका-३ बोराडाँडीबाट एक, बाँकेको खजुरा गाउँपालिका-३ बिगाउँबाट सुमन थापामगरसहित तीन, धनुषाको जनकपुरधाम उपमहानगरपालिका-९ बाट एक जना पक्राउ परेका छन् ।
त्यस्तै, कञ्चनपुरको लालझाँडी गाउँपालिका-२ बाट दुई र पर्साको बिन्दवासिनी गाउँपालिका-४ मधवलबाट गाँजा जस्तो देखिने पदार्थसहित हेटौँडा उपमहानगरपालिका-३ का २३ वर्षीय दिपेश तामाङलाई इलाका प्रहरी कार्यालय पोखरीयाको टोलीले पक्राउ गरेको हो । यस सम्बन्धमा प्रहरीले आवश्यक अनुसन्धान गरिरहेको छ । रासस
