एजेन्सी । अक्षय कुमार स्टारर फिल्म ‘ओएमजी २’ लाई भारतीय सेन्सर बोर्डले ए सर्टिफिकेट दिएको छ । बोर्डले फिल्ममा कुनै पनि कटौती नगरेपनि यसमा २५ वटा परिवर्तन गर्न पक्कै सुझाव दिएको छ ।
यी परिवर्तनहरूमा सबैभन्दा ठूलो परिवर्तन यो हो कि फिल्ममा अक्षयलाई शिवको रूपमा नभई शिवको भक्तको रूपमा देखाउनु पर्छ ।
एक दिनअघि सोमबार सेन्सर बोर्डले फिल्मको ट्रेलरलाई युए सर्टिफिकेट दिएको थियो । योसँगै अब ट्रेलर र फिल्म दुवैको रिलिजको बाटो खुलेको छ ।
चलचित्रमा बोर्डले सुझाव दिएको २५ मध्ये १४ परिवर्तन गर्न निर्माता सहमत भएको बताइएको छ । तर, बाँकी परिमार्जन गर्न नचाहेमा निर्माताले यसका लागि बोर्डलाई पनि मनाउनुपर्नेछ ।
यससँगै यो फिल्म सन्नी देओल स्टारर ‘गदर २’ सँगसँगै ११ अगस्टमा रिलिज हुने पनि तय भएको छ । फिल्मको समय २ घण्टा ३६ मिनेटको हुनेछ । बोर्डको क्लियरन्सका लागि लामो समयदेखि अलपत्र परेको यस चलचित्रको प्रचारप्रसारमा पनि ठूलो असर परेको छ ।
यस चलचित्रमा अक्षय कुमार, पंकज त्रिपाठी र यामी गौतम मुख्य भूमिकामा देखिनेछन् । यो फिल्म २०१२ मा रिलिज परेश रावल र अक्षय कुमार स्टारर ओएमजी (ओ माई गड) को सिक्वेल हो । उक्त फिल्ममा अक्षयले श्रीकृष्णको भूमिका निभाएका थिए ।
