काठमाडौँ । नेकपा माओवादी केन्द्रका अध्यक्ष पुष्पकमल दाहाल प्रचण्डले विदेशी शक्तिले मधेसवादी पार्टी बनाइदिएको बताउनुभएको छ । रुपन्देहीको सम्मरी गाउँपालिकाका अध्यक्ष जितेन्द्र शुक्लालगायतलाई पार्टी प्रवेश गराउँदै उहाँले अब मधेस माओवादीमय बन्ने बताउनुभयो ।
उहाँले मधेसमा माओवादीलाई स्थापित हुन नदिन शान्तिप्रक्रिया लगत्तै भयानक हत्याकाण्ड मच्चाइएको स्मरण गर्नुभयो । उहाँले रुपन्देही र कपिलवस्तुमा मच्चाइएको हत्याकाण्डपछि नै मधेसवादी पार्टीलाई जन्माइएको बताउनुभयो ।
मधेसी जनताको अधिकार स्थापित गर्न माओवादी पार्टीले अभियान सुरु गरेको बेला त्यसलाई रोक्न निकै षड्यन्त्र भएको उहाँको भनाइ थियो । उहाँले मधेसमा माओवादी हावी हुने डरले राष्ट्रिय तथा अन्तर्राष्ट्रियस्तरबाटै मधेसका केही ठाउँमा भयानक हत्याकाण्ड मच्चाइएको र त्यही क्रममा विदेशी शक्तिले मधेसवादी पार्टी बनाइदिएको बताउनुभयो ।
अध्यक्ष प्रचण्डले आफूलाई मधेसका मसिहा भन्नेहरुले केपी ओलीसँग साँठगाँठ गरे पनि अब मधेस प्रदेश र लुम्बिनी प्रदेश माओवादीमय हुने बताउनुभयो ।
