विराटनगर । उद्धव थापाको मुख्यमन्त्री नियुक्तिलाई सर्वोच्चले बदर गरेसँगै पुनर्वहाली पाएका हिक्मत कार्कीले कामचलाउ मुख्यमन्त्रीको रूपमा पुन: कार्यभार सम्हाल्ने भएका छन् ।
सर्वोच्च अदालतले बिहीबार कांग्रेस संसदीय दलका नेता थापाको सरकार असंवैधानिक भन्दै नियुत्ति बदर गरेपछि अर्को सरकार गठन नभएसम्मका लागि कार्की काम चलाउ सरकारको मुख्यमन्त्रीका रूपमा पुनर्वहाली भएका हुन् ।
गत असार २१ गते थापाले सभामुख बाबुराम गौतमको समेत समर्थनसहित मुख्यमन्त्रीमा दाबी पेश गरेका थिए। सोही समर्थनका आधारमा प्रदेश प्रमुख परशुराम खापुङले थापालाई मुख्यमन्त्री नियुक्त गरेका थिए।
सरकार गठन प्रक्रिया असंवैधानिक भएको दाबी गर्दै बदरको मागसहित एमाले संसदीय दलका नेता कार्कीले असार २२ गते रिट निवेदन दिएका थिए । सोहि रिटमा बिहिबार न्यायाधीश ईश्वर खतिवडा, आनन्द मोहन भट्टराई र तीलप्रसाद श्रेष्ठको पूर्ण इजलासले थापालाई मुख्यमन्त्री नियुक्त गर्ने सबै निर्णय बदर गर्दै एक साताभित्र नयाँ सरकार गठनका लागि आदेश दिएको हो ।
कोशी प्रदेशसभामा ९३ जना सांसद रहेकोमा सरकार गठनको दाबी पेश गर्न ४७ सीटको आवश्यकता पर्छ ।
