काठमाडौँ । दक्षिण तथा मध्य एसिया हेर्ने अमेरिकी सहायक विदेशमन्त्री डोनाल्ड लु एक दिवसीय भ्रमणका क्रममा भोलि शुक्रबार नेपाल आउँदैछन् ।
नेपालस्थित अमेरिकी दूतावासका अनुसार नेपाल भ्रमणका क्रममा उनले प्रधानमन्त्री पुष्पकमल दाहाल प्रचण्ड र परराष्ट्रमन्त्री एनपी साउदसँग शिष्टाचार भेटघाट गर्ने कार्यक्रम छ । साथै उनले अमेरिकन चेम्बर अफ कमर्सको एक सदस्य संस्थाका प्रतिनिधिसँग पनि भेटघाट गर्ने जनाइएको छ ।
केही दिनदेखि भारत, बङ्गलादेश र श्रीलंकाको भ्रमणमा निस्केका डोनाल्ड सोही क्रममा उनी नेपाल आउन लागेको बताइएको छ । नेपालका लागि उनको यो तेस्रो भ्रमण हो । यसअघि उनी २०७९ साउन १२ गते तीन दिने नेपाल भ्रमणमा आएका थिए ।
संसद्मा एसपीपीको विवाद चलिरहेको बेला नेपाल भ्रमण गरेका उनले त्यसबेला तत्कालीन प्रधानमन्त्री शेरबहादुर देउवा र तत्कालीन परराष्ट्रमन्त्री डा नारायण खड्कालगायतका अधिकारीलाई भेटेका थिए ।
पहिलोपटक उनी २०७८ मंसिरमा नेपाल आउँदा पनि संसद्मा एमसीसी विवाद चलिरहेको थियो ।
