काठमाडौँ। नेपालको एकदिवसीय अन्तर्राष्ट्रिय वरियता खस्किएको छ । आईसीसीले सार्वजनिक गरेको नयाँ वरियताअनुसार नेपाल एक स्थान तल झरेको हो ।
नयाँ वरियताअनुसार नेपाल १५ औँ स्थानमा झरेको छ । जिम्बावेमा भएको आईसीसी पुरुष क्रिकेट विश्वकप छनोट खेल्न जानुअघि नेपाल १४ औँ स्थानमा रहेको थियो ।
विश्वकप छनोटमा भने नेपाल केवल २ खेल जित्दै समग्रमा आठौं स्थानमा रहेको थियो । एसोसिएट राष्ट्रतर्फ स्कटल्यान्ड (१२ औँ) शीर्ष स्थानमा रहँदा आयरल्यान्ड र नेदरल्यान्ड्स पनि नेपाल भन्दा माथि रहेका छन् ।
नामिबिया, अमेरिका, ओमान र यूएई नेपालभन्दा पछाडि रहेका छन् । वरियताको शीर्षस्थानमा अष्ट्रेलिया रहँदा पाकिस्तान, भारत र न्यूजिल्याण्ड क्रमशः दोस्रो, तेस्रो र चौंथो स्थानमा रहेका छन् ।
