काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेले संसद तीन नेताको मुडमा चल्न नसक्ने बताएका छन् ।
आइतबार संसद् भवन परिसरमा पत्रकारहरूसँग कुराकानी गर्दै सभापति लामिछानेले यस्तो बताएका हुन् ।
महत्त्वपूर्ण कानुन पारित गर्ने, नागरिकका महत्त्वपूर्ण सवालहरू उठाउनुपर्ने बेलामा संसद तीन नेताको मुडअनुसार चलाउन खोजिएको भन्दै उनले आपत्ति समेत जनाए ।
यस्तै, उनले सभामुखले संसदमा रास्वपालाई बोल्न नदिएकोबारे गुनासो गर्दै सदन रास्वपाको कारण रोकिएको भन्ने सन्देश गएकोमा त्यसको पनि खण्डन गरे ।
सरकारले प्रतिपक्षीलाई देखाएर मिटरब्याजसम्बन्धी विधेयक अघि बढाउन पन्छिएको लामिछानेको आरोप छ ।
प्रमुख प्रतिपक्षी दल एमालेसँगको सहमतिमा आज प्रतिनिधि सभा बैठक चल्ने बताइएको थियो । तर, संसद् सचिवालयले भने सूचना टाँस गर्दै सोमबारसम्म बैठक स्थगित गरेको जनाएको छ ।
