काठमाडौँ । बागमती प्रदेश सरकारले आगामी आर्थिक वर्षका लागि प्रस्तुत बजेट सच्याउने प्रतिबद्धता व्यक्त गरेपछि प्रदेशसभाको अवरोध हटेको छ ।
असार १ गते पेश भएको आगामी आर्थिक वर्षको बजेट असन्तुलित र विभेदकारी भएको भन्दै विपक्षी दलहरु नेकपा (एमाले), राष्ट्रिय प्रजातन्त्र पार्टी (राप्रपा) र नेपाल मजदुर किसान पार्टीले प्रदेशसभाको बैठक अवरुद्ध गर्दै आएका थिए ।
विनियोजन विधेयकमाथि छलफल हुन नसक्ने भएपछि सोमबार सर्वदलीय बैठकमा सरकारले प्रतिपक्षी दलहरुलाई सम्बोधन गर्दै बजेट सच्याउने प्रतिबद्धता व्यक्त गरेको हो ।
त्यसपछि बसेको प्रदेशसभाको बैठकमा आर्थिकमामिला मन्त्री बहादुरसिंह लामाले प्रतिपक्षी दलहरुसँग सहमतिअनुसार बजेट कार्यान्वयन गरिने जानकारी दिनुभयो ।
