एजेन्सी । साउथ अभिनेत्री रश्मिका मन्दना चाँडै नै रणवीर कपुरसँग ‘एनिमल’मा देखिने भएकी छिन् । यसैबीच उनीसँग ८० लाख रुपैयाँ (१ करोड २८ लाख नेपाली रुपैयाँ) ठगी भएको खबर आएको छ ।
उनलाई धोका दिने व्यक्ति अरु कोही होइन उनको व्यवस्थापक हो । यो ठगीको बारेमा रश्मिकालाई थाहा हुने बित्तिकै रश्मिकाले उनलाई जागिरबाट निकालिदिएकी थिइन् । तर, यो खबरमा रश्मिकाको तर्फबाट अहिलेसम्म कुनै प्रतिक्रिया आएको छैन ।
हिन्दुस्तान टाइम्सको रिपोर्ट अनुसार म्यानेजरले रश्मिकालाई ८० लाख रुपैयाँ ठगी गरेको आरोप छ । यो थाहा पाएर रश्मिकालाई निकै रिस उठ्यो र उनले तत्कालै म्यानेजरलाई जागिरबाट हटाइन् । जानकारीका अनुसार म्यानेजर लामो समयदेखि रश्मिका मन्दनासँग आवद्ध थिए र अभिनेत्रीलाई थाहा नदिई बिस्तारै पैसा चोर्दै आएका थिए ।
सञ्चारमाध्यमसँग सम्बन्धित एक स्रोतले रश्मिकाले यस विषयमा कुनै चर्चा गर्न नचाहेकोले यसबारेमा केही नबोलेको बताएको छ ।
कामको कुरा गर्ने हो भने, रश्मिका अहिले रणवीर कपूरसँग आफ्नो आगामी फिल्म एनिमलमा व्यस्त छिन् । भर्खरै निर्माण पक्षले फिल्मको प्रि टिजर पनि रिलिज गरेको छ, जसलाई दर्शकले निकै रुचाएका छन् । चलचित्र अगस्ट ११ मा हलमा रिलिज हुँदैछ । साथै, एकै मितिमा रिलिज हुने दुई ठूला फिल्म ‘गदर २’ र ‘ओएमजी २’ सँग यो फिल्म भिड्नेछ ।
