काठमाडौँ । आईसीसी एकदिवसीय विश्वकप छनोट प्रतियोगिता अन्तर्गत नेपालले घरेलु टोली जिम्बावेलाई २९१ रनको विजयी लक्ष्य दिएको छ ।
हरारे स्पोट्र्स क्लबमा टस हारेर ब्याटिङ थालेको नेपालले निर्धारित ५० ओभरमा ८ विकेटको क्षतिमा २९० रन जोडेको हो ।
नेपालका लागि कुशल भुर्तेलले ९९ रनको योगदान दिए । ९५ बल खेलेका कुशलले १३ चौका र २ छक्का प्रहार गरे ।
यस्तै, आशिफ शेखले १०० बलमा ६६ रन जोडे । उनले ७ चौका प्रहार गरे । यस्तै, कुशल मल्लले ४२ बलमा ४१, रोहित पौडेलले २९ बलमा ३१ रन जोड्दा आरिफ शेख ११ बलमा १० रन बनाई आउट भए ।
बलिङतर्फ जिम्बावेका लागि रिचर्ड एनगरवाले चार विकेट लिँदा वेलिङ्टन मसक्द्जाले दुई विकेट लिए । यस्तै, टेन्डाई चतरा र ब्लेसिङ मुजरवानीले एक–एक विकेट लिए ।
जिम्बावेविरुद्धको यो खेल टेस्ट मान्यता प्राप्त राष्ट्रविरुद्ध नेपालको पहिलो एकदिवसीय अन्तर्राष्ट्रिय (ओडिआई) मान्यता प्राप्त खेल पनि हो ।
