काठमाडौँ । अर्थमन्त्री डा प्रकाशशरण महतले करका दरहरु कुनै घरानाको स्वार्थ पूरा गर्न लक्षित नरहेको बताउनुभएको छ ।
प्रतिनिधिसभाको सोमबारको बैठकमा बजेटबारे उठेका प्रश्नको जवाफ दिँदै उहाँले समग्रमा करका दरहरुको प्रभाव राजस्व वृद्धि र अर्थतन्त्र चलायमान बनाउन केन्द्रित रहेको बताउनुभयो ।
नेपालमा भ्याट संकुचन हुँदै गएको र भ्याट छुटको दायरा बढ्दै गइरहेकोले यसलाई सच्याउन खोजिएको उहाँको भनाइ थियो ।
“भ्याटलाई हरेक वर्ष हटाउँदै गयौँ, यसले राजस्वको दायरा खुम्चिएको थियो, वैज्ञानिक कर प्रणालीलाई प्रभावित भयो, पुन: प्रवेश गराउने प्रयास गरेका छौँ”, उहाँले भन्नुभयो ।
अर्थमन्त्री डा महतले आन्तरिक उत्पादनकर्तालाई संरक्षण गर्न उपभोग्य वस्तुमा कर लगाइएको जानकारी दिनुभयो ।
एकातर्फ आलु/तरकारीमा यति अर्बको आयात भयो भन्ने, अर्कोतर्फ आन्तरिक उत्पादनलाई प्राथमिकता दिँदा आलोचना गरिएको उहाँले गुनासो गर्नुभयो । उत्पादनलाई प्रोत्साहन गर्नु एक यन्त्र कर भएको भन्दै उहाँले यसले नेपालका उद्योग व्यवसाय विस्तार गर्न मद्दत गर्ने भनाइ राख्नुभयो ।
