काठमाडौं । नेपालमा आगमी नोभेम्बरमा टि २० विश्वकप एसिया क्षेत्र छनोट आयोजना हुने भएको छ। नेपालले १३ वर्षपछि अन्तर्राष्ट्रिय क्रिकेट परिषद् (आइसिसी) को प्रतियोगिता आयोजना गर्न लागेको हो ।
नेपालले पछिल्लो पटक सन् २०१० मा डिभिजन फाइभ आयोजना गरेको थियो । उक्त प्रतियोगिताको फाइनमा नेपालले अमेरिकालाई ५ विकेटले हराउँदै पहिलो पटक आइसिसीको सिनियरतर्फ उपाधि जितेको थियो । त्यसपछि भने नेपाललमा आइसिसीको प्रतियोगिता हुन सकेको थिएन ।
नेपालले आइसिसीको सिरिजको रुपमा विश्व क्रिकेट लिग च्याम्पियनसिप २०१५/१७ र आइसिसी लिग-२ अँतर्गतको २०१९/२३ सिरिज भने घरेलु मैदानमा आयोजना गरेको थियो । विश्व क्रिकेट लिग च्याम्पियनसिप अन्तर्गत नेपालले टियु मैदानमा २०१६ अप्रिलमा नामिबिया र २०१७ मार्चमा केन्यासँग समान दुई खेल खेलेको थियो ।
आइसिसी विश्वकप लिग २ मा नेपालले २०२० फेब्रुअरीमा अमेरिका र ओमानसँग त्रिकोणात्मक ओडिआई सिरिज खेलेको थियो । त्यस्तै २०२३ फेब्रुअरीमा स्कटल्यान्ड र नामिबियासँग प्रतिस्पर्धा गरेको थियो भने मार्चमा युएई र पपुवा न्युगिनीसँग खेलेको थियो ।
यस्तै, अघिल्लो महिना नेपालले एसियन क्रिकेट काउन्सिल (एसिसी) को खेल १० वर्षपछि आयोजना गरेको थियो । जसमा घरेलु टिम नेपालले उपाधि हात पार्दै भारत र पाकिस्तानसँग एसिया कपमा भेट पक्का गरेको थियो । एसिया कप आगमी सेप्टेम्बरमा पाकिस्तानमा हुदैछ ।
त्यसैगरी नेपालले २०१३ मा एसिसी टि२० कप आयोजना गरेको थियो । २०१३ मार्चमा भएको उक्त प्रतियोगिता फाइनलमा नेपाल अफगानिस्तानसँग ७ विकेटले हारेको थियो ।
नेपालले अब नोभेम्बर १ देखि १० सम्म आइसिसी टि२० विश्वकप एसिया छनोट आयोजना गर्दैछ । प्रतियोगितामा बहराइन, नेपाल, सिंगापुर, हङकङ, ओमान, युएई र एसिया उपक्षेत्र छनोट ए र बी का विजेता हुनेछन् ।
उप क्षेत्र छनोट ए आगमी सेप्टेम्बरमा कतारमा आयोजना हुनेछ ।जसमा घरेलु टोली कतारसँगै साउदीअरेविया, माल्दिभ्स र कुवेत हुनेछन् । यस्तै, उपक्षेत्र छनोट बी जुलाईमा मलेसियामा आयोजना हुनेछ । जसमा मलेसिया, भुटान, चीन र म्यानमार र थाईल्यान्ड हुनेछन् ।
आइसिसी टि२० एसिया कपको फाइनलमा पुग्ने दुई टोलीले २०२४ मा वेस्टइन्डिज र अमेरिकामा हुने टि२० विश्वकप खेल्न पाउँछन् । नेपालले सन् २०१४ मा पहिलो पटक बंगलादेशमा भएको टि२० विश्वकप खेलेको थियो। घरेलु मैदानमा आयोजना हुने खेल जिते नेपालले २०१४ पछि पहिलोपटक टि२० विश्वकप खेल्नेछ ।
