काठमाडौं । नक्कली शरणार्थी प्रकरणमा पक्राउ परेका पूर्वगृहमन्त्री एवं नेपाली कांग्रेसका नेता बालकृष्ण खाँणलाई निलम्बनको माग गर्दै नेविसंघले काठमाडौंमा प्रदर्शन गरेको छ ।
त्रिचन्द्र क्याम्पसका कांग्रेसनिकट विद्यार्थी सङ्गठन नेविसंघले खाँणलाई निलम्बन गर्न माग गरेका हुन् । उनीहरुले ‘सभापति ज्यु खाँणलाई किन निलम्बन नगरेको ?’ लेखिएको प्लेकार्डसहित प्रदर्शन गरेका छन् ।
उनीहरुले नाता र नेता नहेरी भ्रष्टाचारीलाई कठघरामा उभ्याउन माग गरेका छन् । उनीहरुले प्रतिकात्मक रुपमा कागजको हत्कडी र कैदीबन्दीले लगाउने पोशाक समेत प्रदर्शन गरेका छन् ।
नेपालीलाई नक्कली शरणार्थी प्रकरणमा खाँणलाई २७ वैशाखमा पक्राउ गरेको थियो । यही प्रकरणमा मुछिएका नेकपा एमालेका सचिव एवम् पूर्वउपप्रधानमन्त्री टोपबहादुर रायमाझी भने फरार रहेका छन् ।
