एजेन्सी । पाकिस्तानले एसिया कपका लागि एसियन क्रिकेट काउन्सिल (एसीसी)लाई नयाँ प्रस्ताव पठाएको छ । पाकिस्तान क्रिकेट बोर्ड (पीसीबी)का प्रमुख नजम अजिज सेठीले यदि एसीसी सदस्यहरू भारतका खेलहरू अन्य देशहरूमा आयोजना गर्न तयार नरहेको खण्डमा पाकिस्तानले यूएईमा प्रतियोगिता आयोजना गर्न सक्ने बताएका छन् ।
नजम सेठीले मे ८ मा दुबईमा एसीसी सदस्यहरूसँग भेट गरे । यहाँ उनको हाइब्रिड मोडल प्रतियोगिताको प्रस्ताव अस्वीकार गरी एसिया कप पाकिस्तानमा आयोजना नगर्ने निर्णय भएको भारतीय सञ्चारमाध्यमले जनाएको छ । श्रीलंकालाई प्रतियोगिताको आयोजकत्व हस्तान्तरण गर्न सकिने बताइयपनि एसीसी प्रमुख जय शाहको आधिकारिक निर्णय भने आउन बाँकी छ ।
पीसीबी स्रोतलाई उद्धृत गर्दै मिडिया रिपोर्टमा भनिएको छ कि सेठीले अर्को दिन अर्थात मे ९ मा पनि सदस्यहरूलाई भेटेका थिए । नयाँ प्रस्ताव हस्तान्तरण गर्दै नयाँ प्रस्तावलाई स्वीकार नगरे पाकिस्तान प्रतियोगिताबाट बाहिरिने संकेत पनि दिएको छ । सेप्टेम्बर २ देखि १७ सम्म हुने एसिया कपमा भारत, पाकिस्तान, श्रीलंका, बंगलादेश, अफगानिस्तान र नेपालले खेल्नेछन् ।
आईसीसीले सन् २०२३ मा हुने एसिया कपको आयोजना पाकिस्तानलाई दिएको छ । बीसीसीआईले क्यालेन्डर सार्वजनिक हुनेबित्तिकै भारतीय टोली पाकिस्तान खेल्न नजाने स्पष्ट पारेको थियो । दुई देशबीचको मतभेदका कारण बीसीसीआईले एसिया कप तटस्थ स्थानमा आयोजना गर्न आग्रह गरेको थियो । पाकिस्तान क्रिकेट बोर्ड सहमत भएन, किनकि उसले एसिया कपबाट नै आफ्नो बिग्रिँदै गएको आर्थिक अवस्था सुधार्ने आशा राखेको छ ।
८ मे मा एसीसीका सदस्यहरू दुबईमा भेला भए । यहाँ पीसीबी प्रमुख नजम सेठीले एसिया कपका लागि हाइब्रिड मोडल प्रस्ताव राखेका छन् । सोही अनुसार भारतको खेल युएईमा र पाकिस्तानको खेल पाकिस्तानमा मात्र गराउने प्रस्ताव गरिएको थियो ।
एसीसीले हाइब्रिड मोडलको प्रस्ताव कहिल्यै पनि यस मोडलको पक्षमा नरहेको भन्दै अस्वीकार गरेको थियो । बजेट र टोलीले सामना गर्ने समस्याका कारण एसीसीले यो मोडललाई स्वीकार गर्दैन । स्रोतका अनुसार एसीसीले पाकिस्तान र भारत एउटै समूहमा परेमा यो समूहको तेस्रो टोलीले पाकिस्तान र युएईबीच पनि यात्रा गर्नुपर्नेछ । प्रसारणकर्ताहरू पनि दुई देशहरूमा छुट्टै युनिटहरू पठाउन चाहँदैनन् ।
स्रोतका अनुसार श्रीलंकाले बीसीसीआईलाई साथ दिएर आयोजकको प्रस्ताव गरेकोमा पीसीबी प्रमुख सेठी छक्क परेका छन् । फेब्रुअरीमा भएको एसीसीको पछिल्लो बैठकमा बंगलादेश, पाकिस्तान र अफगानिस्तानले श्रीलंकामा आयोजना गर्ने प्रस्ताव अस्वीकार गरेका थिए । पछिल्लो बैठकमा आयोजकका रुपमा पाकिस्तानलाई निरन्तरता दिने सहमति भएको थियो ।
पीसीबी स्रोतका अनुसार सेठीले एसीसीको अगाडि बीसीसीआईको समस्याबारे पनि कुरा गरेका थिए । बीसीसीआईले सेप्टेम्बरमा युएईको मौसम खेलकुदका हिसाबले निकै तातो हुने बताएको थियो । नजम सेठी २०२० मा बीसीसीआईले सेप्टेम्बरदेखि नोभेम्बरसम्म मात्र यूएईमा आईपीएल खेलहरू आयोजना गरेको स्मरण गराउँछन् ।
एसीसी स्रोतका अनुसार सदस्य राष्ट्रहरू एसिया कप श्रीलंकामा आयोजना गर्ने पक्षमा छन् । यसबारे एसीसीको आधिकारिक धारणा आउन बाँकी छ । पीसीबी स्रोतका अनुसार नजम सेठीले एसीसी बैठकमा जानुअघि नै बोर्डका सदस्यहरूसँग कुरा गरेका थिए । उनले एसिया कप पाकिस्तानमा नहुने हो भने पीसीबीले त्यस अवधिमा ३–४ देशको प्रतियोगिता आयोजना गर्ने तयारी थाल्नुपर्ने बताएका थिए ।
पाकिस्तान क्रिकेट बोर्डले पनि विश्वकप नखेल्ने धम्की दिएको छ । एकदिवसीय विश्वकप यसै वर्षको अक्टोबरमा भारतमा हुने भएको छ । पीसीबीले एसिया कप खेल्न नआए भारतमा पनि खेल्न नजाने धम्की दिएको छ । साथै, पाकिस्तानले आईसीसीलाई विश्वकपमा आफ्ना खेलहरू भारतबाट बाहिर सार्न अनुरोध पनि गरेको छ ।
