एजेन्सी । ओपनर फिल साल्टको विस्फोटक इनिङ्सको सहायतामा दिल्ली क्यापिटल्सले इन्डियन प्रिमियर लिग–१६ को ५० औं खेलमा रोयल च्यालेन्जर्स बैंग्लोरलाई ७ विकेटले पराजित गरेको छ ।
टोलीले १६.४ ओभर (१०० बल)मा ३ विकेट गुमाएर १८२ रनको लक्ष्य पुरा गरेको थियो । शनिबार अरुण जेटली मैदानमा टस जितेर ब्याटिङ गरेको बैंगलोरले २० ओभरमा ४ विकेट गुमाएर १८१ रन बनाएको थियो ।
यो जितसँगै दिल्लीले बैंगलोरसँग अघिल्लो हारको बदला लिएको छ । यस सिजनको पहिलो खेलमा बैंगलोरले दिल्लीलाई घरेलु मैदानमा २३ रनले पराजित गरेको थियो । जितपछि दिल्लीले प्लेअफ प्रवेशको आशा जीवित राखेको छ । टोलीले प्लेअफमा पुग्न बाँकी चार खेल जित्नुपर्नेछ । यो सिजनमा दिल्लीको चौथो जित हो ।
बैंगलोरले १८१ रन बनाए पनि बलरले त्यसलाई रक्षा गर्न सकेनन् । बैंगलोरका विराट कोहली (५५ रन) ले यस लिगमा आफ्नो ५० औं अर्धशतक बनाए भने महिपाल लोमरर (अविजित ५४)ले आफ्नो पहिलो अर्धशतक बनाए । कप्तान फाफ डु प्लेसिसले ३२ बलमा ४५ रनको योगदान दिए ।
दिल्लीका लागि मिचेल मार्सले दुई विकेट लिए । खलील अहमद र मुकेशले एक–एक विकेट लिए ।
जवाफमा दिल्लीका ओपनर फिल साल्टले ४५ बलमा ८७ रनको आक्रामक पारी खेले भने कप्तान डेभिड वार्नरले १४ बलमा २२ र मिचेल मार्सले १७ बलमा २६ रन बनाए । अन्तिममा रिले रुसोले २२ बलमा ३५ र अक्षर पटेलले ३ बलमा छक्का सहित ८ रन बनाए ।
बैंगलोरका जोस हेजलउड, करण शर्मा र हर्षल पटेलले एक–एक विकेट लिए ।
यसैबीच, आरसीबीका ब्याट्सम्यान विराट कोहलीले दिल्ली क्यापिटल्सविरुद्धकै खेलमा आईपीएलमा १ हजार रन पुरा गरेका छन् । प्रतियोगिताको इतिहासमा ७ हजार रन पुरा गरेका छन् । उनले २३३ खेलमा ७०४३ रन बनाएका छन् । कोहली लिगमा ७ हजारभन्दा बढी रन बनाउने एकमात्र ब्याट्सम्यान हुन् ।
