काठमाडौँ । नक्कली भुटानी शरणार्थी बनाई नेपाली युवालाई अमेरिका पठाउने धन्दामा संलग्न रहेको आरोपमा पक्राउ पुर्जी जारी भएका पूर्वउपप्रधानमन्त्री तथा नेपाल कम्पयुनिष्ट पार्टी (एमाले)का सचिव सम्पर्कविहीन हुनुभएको छ ।
प्रतिनिधिसभाका सभामुख देवराज घिमिरेसँगै बुधबार अर्घाखाँचीमा आयोजना गरिएको एक कार्यक्रममा अतिथिका रुपमा उपस्थित हुनुभएका रायमाझी काठमाडौँ आउने क्रममा बुटवलबाट सम्पर्कविहीन हुनुभएको हो ।
रायमाझीले प्रयोग गर्दै आएको प्रदेश ३ ०१ ०२२ च ०५८२ नम्बरको टाटा हेक्सा गाडी बिहीबार चितवनबाट मुग्लिन हुँदै काठमाडौँतर्फ आइरहेको अनुमान गरी पिछा गरेकोमा काठमाडौँ आइपुग्दा भने गाडीमा चालक मात्र रहेको पाइएको प्रहरीले जनाएको छ ।
रायमाझी सो गाडीमा नआएको हो वा बीच बाटोबाटै फरार भएको हो भन्नेबारे यकिन भएको छैन । रायमाझी सम्पर्कविहीन भएको र खोजी कार्य जारी रहेको जिल्ला प्रहरी कार्यालय काठमाडौँका प्रमुख दानबहादुर कार्कीले जानकारी दिनुभयो ।
नक्कली भुटानी शरणार्थी बनाउन प्रमुख भूमिका खेलेको आरोपमा प्रहरीले गृह मन्त्रालयका पूर्वसचिव तथा उपराष्ट्रपति कार्यालयका सचिव टेकनारायण पाण्डेलाई बुधबार पक्राउ गरेको थियो । २०७८ साउन २७ गतेदेखि २०७९ असोज २ सम्म गृहसचिव रहेका पाण्डेले संगठित गिरोहसँग मिलेमतो गरी नक्कली शरणार्थी बनाउन नीतिगत निर्णय गराएको र रकमसमेत लेनदेन गरेको खुलेको प्रहरीको दाबी छ ।
काठमाडौँ जिल्ला अदालतले सचिव पाण्डेलाई तीन दिन हिरासतमा राखेर थप अनुसन्धान गर्न अनुमति समेत दिएको छ । एमाले सचिव रायमाझीका छोरा सन्दीपलाई प्रहरीले बुधबार बुटवलबाट काठमाडौँ ल्याएर अदालतबाट थुनामा राख्न अनुमति लिएको छ । यस प्रकरणमा अर्का योजनाकार पूर्वगृहमन्त्री रामबहादुर थापाका सुरक्षा सल्लाकार इन्द्रजित राईलाई प्रहरीले मंगलबार पक्राउ गरेको थियो । थापाका छोरा प्रतीक तथा पक्राउ परेका इन्द्रजीत राईका छोरा निरजविरुद्ध पनि पक्राउ पुर्जी जारी भएकोमा प्रहरीले अझै नियन्त्रणमा लिएको छैन ।
परिसरका प्रवक्ता सीताराम रिजालले आठ जना पक्राउ परेको र अझै १० देखि १२ जना अनुसन्धानमा तानिनसक्ने बताउनुभयो । राई, पाण्डे र रायमाझीसँगै यसअघि पक्राउ परेका दाङका सन्देश शर्मा, मोरङका केशल दुलाल, सागर राई, ललितपुरका सानु भण्डारी र पाँचथरका कुमार गुरुङसँग प्रहरीले बयान लिइरहेको छ ।
सो प्रकरणको अनुसन्धान गरिरहेको काठमाडौँ प्रहरी परिसरमा हालसम्म १०६ जना पीडितका २० वटा उजुरी दर्ता भएका छन् । पीडितले दिएको जाहेरीमा एक जनाबाट १० देखि ५० लाख रुपैयाँसम्म ठगी गरिएको आरोप छ । सो प्रकरणमा प्राप्त भएका कागजात र प्रमाणलाई केन्द्रीय विधिविज्ञान प्रयोगशालामा परीक्षणका लागि पठाइएको छ । गिरोहले झण्डै नौ सय व्यक्तिबाट एक अर्ब रुपैयाँभन्दा बढी ठगी गरेको अनुमान गरिएको छ ।
गिरोहका सदस्य पक्राउसँगै राजनीतिक वृत्तमा समर्थन र विरोध भएको छ । एमाले सचिव टोपबहादुर रायमाझीमाथि पक्राउ पुर्जी जारी भएपछि एमाले अध्यक्ष केपी शर्मा ओलीले बहालवाला सांसद र पूर्वप्रधानमन्त्रीलाई पक्राउ गरेर हतकडी लगाउन हतार नगर्न चेतावनी दिनुभएको छ ।
यसै विषयलाई लिएर अध्यक्ष ओलीले प्रधानमन्त्री पुष्पकमल दाहालसँग भेटेर रायमाझीलाई बाटोबाटै पक्राउ गर्न खोजिएको भन्दै आपत्ति जनाउनुभएको थियो । नेपाली कांग्रेसका वरिष्ठ नेता डा शेखर कोइराला र महामन्त्री गगनकुमार थापाले नेपाली नागरिकलाई नक्कली शरणार्थी बनाएर ठगी गर्ने जोसुकै भए पनि कानुनी दायरामा ल्याउन माग गर्नुभएको छ । यो समाचार आजको गोरखापत्रमा प्रकाशित छ ।
