काठमाडौँ । मदन भण्डारी फाउन्डेसनले ‘मदन भण्डारी राष्ट्रिय पुरस्कार २०७९’ र ‘मदन भण्डारी रुपान्तरण नेतृत्व राष्ट्रिय पुरस्कार’ का लागि आवेदन खुला गरेको छ ।
दुवै पुरस्कारको राशि जनही रु १ लाख रहेको छ । जननेता मदन भण्डारीको ७२औँ जन्मजयन्तीका सन्दर्भमा आगामी असार १४ गते ती पुरस्कार प्रदान गरिने फाउन्डेसनले जनाएको छ ।
मदन भण्डारी राष्ट्रिय पुरस्कार २०७९ आधुनिक चिकित्सा प्रविधिको प्रयोगका माध्यमबाट नेपाली भूमिमा रही नयाँ र लाभदायी शल्यक्रिया प्रविधिको विकास, अंग प्रत्यारोपणका विशेष सेवाहरु (मुटु, कलेजोसँग सम्बन्धित समस्याहरु, जन्मजात अपांगताको उपचार र महिलाहरुको पाठेघर खस्ने जस्ता समस्याहरुको उपचार व्यवस्थापन) तथा अन्य जटिल र संवेदनशील क्षेत्रको उपचारमा योगदान पुर्याएको तथा सो सेवाको संस्थागत विकासका साथै देशका दुर्गम स्थान र समुदायकेन्द्रीत, गरिब, असहाय र सेवाबाट वञ्चित रहेका जनसंख्याको सहज स्वास्थ्य पहुँचका लागि विशेष भूमिका खेलेको व्यक्तित्वलाई प्रदान गरिने पनि फाउन्डेसनले उल्लेख गरेको छ ।
त्यस्तै राष्ट्रिय खेलकुद परिषद्, नेपालद्वारा मान्यता प्राप्त खेलकुदका विविध विधा र क्षेत्रका गतिविधिहरुमा १० वर्षदेखि लगनशील र समर्पित ढंगले क्रियाशील रही सफलताहरुका मानकहरु कायम गरेर नयाँ पुस्ताका बीच खेल क्षेत्रको ज्ञान सीपको प्रचार तथा नेतृत्व हस्तान्तरणका माध्यमबाट नयाँ पुस्ता तयार गर्ने अभियानमा योगदान दिँदै समाज परिवर्तन र विकामा महत्त्वपूर्ण भूमिका खेल्ने व्यक्तित्वलाई मदन भण्डारी रुपान्तरण नेतृत्व राष्ट्रिय पुरस्कार प्रदान गरिने छ ।
पुरस्कारका लागि उपयुक्त व्यक्ति वा संस्थाको छनोट मापदण्डका आधारमा उपयुक्त व्यक्तिले फाउन्डेसले उपलब्ध गराएको आवेदन फाराम भरी व्यक्ति स्वयमले आवेदन दिन सकिने जनाइएको छ ।
त्यस्तै पुरस्कारका लागि उपयुक्त व्यक्तिको सिफारिसका लागि सिफारिस गर्ने व्यक्ति वा संस्थाले पनि उपलब्ध गराइएको आवेदन फाराम भरी सिफारिस गरिदिन फाउन्डेसनले सबैलाई आह्वान गरेको छ ।
प्राप्त आवेदनहरुको आधारामा पुरस्कारको अन्तिम निर्णय सो प्रयोजनका लागि तोकिएको विज्ञहरुको समूहले गर्ने फाउन्डेसनले उल्लेख गरेको छ ।
फाउन्डेसनले आवेदन फाराम वेवसाइट www.mbf.org मा उपलब्ध हुने र फाउन्डेसनको केन्द्रीय कार्यालय गौशाला काठमाडौँमा इमेलमार्फत mbfnepal@gmail.com मा पठाउन सकिने जनाएको छ ।
।
