काठमाडौँ । प्रधानमन्त्री पुष्पकमल दाहाल प्रचण्डले असफल भइसकेको प्रधानमन्त्री रोजगार कार्यक्रम बदल्ने बताउनुभएको छ ।
चितवनमा भएको एक कार्यक्रममा उहाँले सरकार बजेट निर्माणमा रहेको उल्लेख गर्दै पहिलाका कतिपय कार्यक्रम असफल भएकाले तिनलाई बदल्ने बताउनुभयो । “प्रधानमन्त्री रोजगार कार्यक्रम आदि कार्यक्रमले नतिजा राम्रो दिएन, तिनीहरुलाई बदल्नुपर्छ”, उहाँले भन्नुभयो ।
उहाँका अनुसार अनुदानका कार्यक्रमहरुमा समेत फेबदल गर्ने तयारी गरिएको छ । उहाँले भन्नुभयो, “जसरी अनुदान वितरण गर्ने तरिका अपनाइयो । वास्तविक किसान जसले काम गर्छ उनीहरुकहाँ त्यो अनुदान पुगेको छैन् । बिचौलियाले नै त्यो अनुदानबाट फाइदा उठाएको भन्ने व्यापकरुपले आयो । त्यसकारण त्यस्ता कार्यक्रम म बदल्दैछु ।”
प्रधानमन्त्री प्रचण्डले आगामी आर्थिक वर्षको बजेट युवाहरुलाई फोकस गरेर आउने जानकारी दिनुभयो । “अहिलेको बजेटको फोकस युवाहरुलाई सम्बोधन गरेर रोजगार सिर्जना गर्नेमा नै हुन्छ । कृषिमा नै हुन्छ । उद्योगहरुमा पनि कृषिमा आधारित कृषिमै जोड हुन्छ”, उहाँले भन्नुभयो ।
