काठमाडौं । एसिसी प्रिमियर कपमा कुवेतले सिंगापुरलाई ४ विकेटले हराएको छ । टियु क्रिकेट मैदानमा कुवेतले दोस्रो जितका साथ सेमिफाइनल खेल्ने सम्भावना मजबुत बनाउँदा सिंगापुर जितविहीन हुँदै प्रतियोगिताबाट बाहिरिएको छ ।
जितको लागि १ सय १४ रनको सामान्य लक्ष्य पाएको कुवेतले २६.३ ओभरमा ६ विकेट गुमाउँदै पूरा गर्यो । कुवेतको जितमा मित भावसर ५० बलमा १ चौका र १ छक्कासहित २७ रनमा अविजित रहे । उनले स्पिनर अक्षर पुरीको बलमा छक्का हान्दै खेल सकाएका थिए ।
यस्तै, यासिन पटेल २१ रनमा अविजित रहँदा कुवेतका ओपनर अद्नान इद्रिसले सर्वाधिक ३८ रन बनाए । रविजा सनदरुवान ५, कप्तान मोहम्मद अस्लाम ९ र शिराज खान १० रन
बनाएर आउट भए ।
सिंगापुरको लागि बलिङ गरेका अक्षर पुरी र विनोथ भास्करनले समान २र २ विकेट लिए । यस्तै, आदित्य भर्गव र थिलिपनले समान एक विकेट लिए ।
त्यसअघि टियु क्रिकेट मैदानमा टस हारेर पहिला ब्याटिङको निम्तो पाएको सिंगापुर ३१.४ ओभरमा १ सय १३ रनमा अल आउट भएको थियो । सिङ्गापुरका लागि सुरुआती ब्याट्सम्यान अर्मत्य कौलले सर्वाधिक ४५ रनको योगदान दिएका थिए । उनले ६० बल नौ चौकाको मद्दतमा ४५ रन बनाएका थिए ।
त्यसैगरी मनप्रित सिंहले ४४ बलमा २८ रन बनाए भने थिलिपन उमरदुराईले १३ रन जाडे । त्यसबाहेक सिङ्गापुरका अन्य खेलाडीले दोहोरो अङ्कमा रन बनाउन सकेनन् ।
सिङ्गापुरलाई सहजै समेट्ने क्रममा कुवेतका कप्तान मोहम्मद अस्लाम एक्लैले पाँच विकेट लिएका थिए भने शिराज खानले तीन विकेट झारे । त्यस्तै यासिन पटेल र अद्नान इड्रिसले समान एक एक विकेट लिए ।
समूह बी मा रहेको कुवेत ३ खेलमा २ जित र १ हारसहित ४ अंकका साथ तेस्रो स्थानमा छ । कुवेतले अन्तिम खेलमा बिहीबार हङकङसँग मुलपानी मैदानमा खेल्नेछ । उक्त खेलमा विजयी भएमा सेमिफाइनलको यात्रा तय गर्नेछ । पराजित भएमा वा अंक बाँडेको खण्डमा भने बाहिरिनेछ ।
समूह बी मा हङकङ ३ खेलमा ५ अंकका साथ शीर्ष स्थानमा छ । युएई ३ खेलमा २ जित र १ हारसहित ४ अंकका साथ दोस्रो स्थानमा छ । बहराइन ३ खेलमा १ जित, एक हार र एक खेलमा अंक बाँड्दै ३ अंकका साथ तेस्रो स्थानमा छ।
समूह ए बाट ३ खेलमा ५ अंकका साथ नेपाल सेमिफाइनलमा पुगि सकेको छ । समूह ए बाट साउदी अरेविया र ओमानबीचको विजेता सेमिफाइनलमा पुग्नेछ ।
