काठमाडौँ । भुटानी शरणार्थी बनाई अमेरिका लैजाने भन्दै ठगी गर्ने गिरोहविरुद्ध थप १० पीडितहरुले जाहेरी दिएका छन् ।
काठमाडौँमा सन्देश शर्मा, सानु भण्डारी, केशव दुलाल समेतको संयुक्त मिलेमतोमा २०७७ साल देखि हालसम्म विभिन्न नेपाली नागरिकलाई भुटानी शरणार्थी बनाई अमेरिका लैजान्छु भनि प्रलोभन र विश्वासमा पारी १० जना पीडितहरुबाट करिब ५ करोड १९ लाख ९७ हजार भन्दा बढी ठगी गरेको किटानी जाहेरी प्राप्त भएको प्रहरीले जनाएको छ ।
कास्की, दाङ, मोरङ, रुकुम लगायतका जिल्लाहरुका १० जना पीडितहरुले उक्त जाहेरी दिएका हुन् । उक्त जाहेरी दरखास्त लगायतका कागजातहरु आवश्यक अनुसन्धान तथा कारबाहीको लागि जिल्ला प्रहरी परिसर टेकु काठमाडौँ पठाईएको काठमाडौं उपत्यका अपराध अनुसन्धान कार्यालयले जनाएको छ ।
