काठमाडौँ । प्रमुख तीन दलका शीर्ष नेताहरूको बैठकमा संवैधानिक परिषद् बैठक चाँडै बोलाएर प्रधानन्यायाधीश सिफारिस गर्ने सहमति भएको छ ।
संसद्मा प्रमुख प्रतिपक्षी दल नेकपा (एमाले) का अध्यक्ष केपी शर्मा ओली निवास बालकोटमा बसेको बैठकमा प्रधानन्याधीश सिफारिस गर्ने सहमति भएको कांग्रेसका प्रमुख सचेतक रमेश लेखकले जानकारी दिनुभयो ।
उनले भने, ‘सर्वोच्च अदालतको प्रधानन्यायाधीश कार्यवाहक हुनुहुन्छ । लामो समयदेखि सर्वोच्चको नेतृत्वनै कार्यवाहकमा भएकाले यो स्थिति रहनुहुँदैन भन्ने कुरामा प्रधानमन्त्रीले पहल गर्नुभयो । स्थायी नियुक्तीका लागि पहल गर्नुभयो । त्यसमा प्रधानमन्त्री, कांग्रेस सभापति देउवा र ओलीजीबीच सहमति भएको छ ।’
शीर्ष नेताहरुबीच संवैधानिक परिषद्को बैठक राख्ने विषय सहमति भएकोसमेत उहाँले जानकारी दिनुभयो ।
त्यसैगरी टिआरसी विधेयक, संसद् सञ्चालन र समिति गठनको विषयमा पनि नेतृत्वबीच सहमति जुटेको उहाँले पत्रकारहरुलाई बताउनुभयो । संवैधानिक परिषद्को बैठकको मिति प्रधानमन्त्रीले तोकेर खबर गर्ने कुरा भएको नेता लेखकले बताउनुभयो ।
