काठमाडौँ । नेकपा एमालेका अध्यक्ष केपी शर्मा ओली स्वास्थ्यमा समस्या आएर उपनिर्वाचनको चुनावी अभियानमा सहभागि हुन नपाउँदा चिन्ता व्यक्त गरेका छन् ।
अध्यक्ष ओलीले समाजिक सञ्जालमार्फत आफ्नो स्वास्थ्य अवस्थाबारे जानकारी गराउँदै आफू चुनावी अभियानमा सहभागी हुने इच्छा भएपनि स्वास्थ्यका कारण उपस्थित हुन नसकेको बताएका हुन् ।
‘भाईरल ज्वरोका कारण मेरो स्वास्थ्यमा केही समस्या आएको छ । अहिले म एन्टिबायोटिक औषधि खाएर निवासमै आराम गरिरहेको छु । तनहुँ, चितवन र बारामा वैशाख १० गते हुने उपनिर्वाचनमा हाम्रा पार्टीका उम्मेदवारहरुको चुनावी अभियानमा सहभागि हुने मेरो इच्छा थियो । तर, अहिले म ती कार्यक्रमहरुमा सहभागि हुन सकिरहेको छैन ।’ ओलीले भनेका छन् ।
यस्तै ओलीले बैशाख १० मा हुने उपनिर्वाचनमा तनहुँ– १ मा सर्वेन्द्र खनाल, चितवन–२ मा राम न्यौपाने र बारा–२ मा पुरुषोत्तम पौडेललाई विजय गराउन मतदाताहरु समक्ष आग्रह समेत गरेका छन् । स्वास्थ्य अवस्था ठीक भएपछि उपयुक्त समयमा म भेट्न चुनावी अभियानमा जोडिने ओलीको भनाई छ ।
