काठमाडौं । नेपाली कांग्रेसबाट थप ५ जना मन्त्री र एक राज्यमन्त्रीको नाम तय भएको छ । सभापति शेरबहादुर देउवा र शेखर कोइरालाबिच इतर समुहलाई तीन मन्त्री र एक राज्यमन्त्रीको लागि सहमति भएको छ ।
महामन्त्री गगन थापाले प्रदीप पौडेललाई मन्त्री बनाउन दबाब दिएका थिए । तर देउवाले नमानेपछि यसमा गगन असन्तुष्ट रहेको बताइन्छ ।
कोइराला पक्षले कम्तीमा ३ मन्त्री माग गरेका कारण यसअघि शपथग्रहण हुन सकेको थिएन । अब कांग्रेसले थप एक मन्त्रालय पाउँदा शेखर पक्षले ३ मन्त्री र एक राज्यमन्त्री पाउने भएको हो ।
शेखर पक्षबाट उपसभापति धनराज गुरुङ, मोरङ १ का डिगबहादुर लिम्बु र कपिलवस्तु २ का सुरेन्द्र आचार्यले मन्त्री बन्ने भएका छन् । राज्यमन्त्रीमा भने जाजरकोटकी मैना रावल कार्कीको नाम राखिएको बताईएको छ।
यसअघि देउवा पक्षबाट ४ मन्त्री भइसकेका छन् । अब मोहन बस्नेत र एनपी साउद थपिने बताइएको छ । बैशाख १० गते हुने उपनिर्वाचनपछि मन्त्रिपरिषद्ले पूर्णता पाउने बताइएको छ ।
