एजेन्सी । भारतीय फुटबल टोली आइतबार पाँच स्थान सुधार गर्दै फिफा विश्व वरियतामा १०१ औँ स्थानमा पुगेको छ । हालै इम्फालमा भएको त्रिदेशीय फुटबल प्रतियोगितामा भारतले म्यानमारलाई १–० र किर्गिस्तान २–० ले पराजित गरेको थियो।
भारत अहिले न्युजिल्यान्डभन्दा एक स्थान तल र केन्याभन्दा एक स्थान माथि छ । १२००.६६ अंक रहेको भारत एसियाली देशहरूमा १९ औं स्थानमा छ । एसियामा जापान शीर्ष स्थानमा छ । भारतको उत्कृष्ट वरियतामा सन् १९९६ मा ९४ औँ रहेको थियो ।
विश्व च्याम्पियन अर्जेन्टिना एक स्थानको अग्रता लिएर शीर्ष स्थानमा उक्लिएको छ । त्यसपछि फ्रान्स, ब्राजिल, बेल्जियम, इंग्ल्याण्ड, नेदरल्यान्ड्स, क्रोएसिया, इटाली, पोर्चुगल र स्पेनका टोली छन् ।
फिफा विश्व वरियतामा यो वर्षको पहिलो सूची हो, अघिल्लो सूची डिसेम्बरमा जारी गरिएको थियो ।
