काठमाडौं । आगामी जुन जुलाईमा जिम्बावेमा हुने एकदिवसीय विश्वकप छनोटमा डिसिजन रिभ्यु सिस्टम (डीआरएस)नहुने भएको छ ।
अन्तर्राष्ट्रिय क्रिकेट परिषद् (आइसीसी) ले जिम्बावेमा हुने विश्वकप छनोटमा डीआरएस नहुने स्पष्ट पारेको छ । तर, तेस्रो अम्पायरको निगरानीमा भने रनआउट हुने पुष्टि गरेको छ ।
डिआरएस मार्फत मैदानमा रहेका अम्पायरहरूले तेस्रो अम्पायरसँग ( रिभ्यू) परामर्श गर्न सक्छन् । यस्तै, खेलाडीहरूले पनि तेस्रो अम्पायरसँग मैदानमा रहेका अम्पायरहरूको निर्णयमा (प्लेयर रिभ्यू) विचार गर्न अनुरोध गर्न सक्छन्।
२०१८ को विश्वकप छनोटमा पनि डीआरएस उपलब्ध थिएन । जिम्बावेमा भएको छनोटमा ३४ खेलमध्ये १० मा मात्रै थर्ड अम्पायरको प्रयोग गरिएको थियो। यद्यपी, यस वर्ष सर्वोच्च क्रिकेट नियन्त्रण निकायले सबै खेलका लागि तेस्रो अम्पायर समावेश गर्ने बताएको छ । तर, अल्ट्राएज वा बल ट्र्याकिङ जस्ता अन्य कुनै पनि समीक्षा प्रविधि उपलब्ध हुने छैन।
आगामी जुन १८ तारिखबाट सुरु हुने विश्वकप छनोटमा नौ टोलिले स्थान पक्का गरिसकेका छन् । जसमा श्रीलंका, वेस्टइन्डिज, जिम्बावे, नेदरल्यान्ड्स, नेपाल, ओमान, स्कटल्यान्ड, युएई र अमेरिका रहेका छन् ।
श्रीलंका, वेस्टइन्डिज, जिम्बावे र नेदरल्यान्ड्स सुपर लिगबाट पुछारमा रहँदै विश्वकप छनोटमा पुगेका हुन् । अब सुपर लिगबाट आयरल्यान्ड र दक्षिण अफ्रिका मध्ये एक टोली विश्वकप छनोटमा आउनेछन् । यस्तै, लिग टू बाट स्कटल्यान्ड शीर्ष, ओमान दोस्रो र नेपाल तेस्रो स्थानमा रहँदै सोझै विश्वकप छनोटमा पुगेका थिए ।
त्यसैगरी, प्लेअफबाट अमेरिका शीर्ष र युएई दोस्रो स्थानमा रहँदै विश्वकप छनोटमा पुगेका हुन् ।
विश्वकप छनोटमा सुपर लिगका पुछारका पाँच टोली, लिग टू का शीर्ष तीन र छनोट प्लेअफका शीर्ष दुई टोली गरि कुल १० टोलीले खेल्नेछन् । विश्वकप छनोटमा १० टोलीलाई दुई समूहमा विभाजन गरिनेछ । जसबाट हरेक समूहका शीर्ष तीन टोलीले सुपर सिक्समा स्थान बनाउनेछन् । सुपर सिक्सबाट शीर्ष दुई टोलीले आगामी अक्टोबर नोभेम्बरमा भारतमा हुने आईसीसी एकदिवसीय विश्वकप खेल्नेछन् ।
सुपर लिगमा रहेका आयोजक भारतसहित शीर्ष ७ टोलीले विश्वकपमा स्थान बनाईसकेका छन् । अब दक्षिण अफ्रिका र आयरल्यान्ड मध्ये एक टोली सोझै विश्वकपमा पुग्दा एक टोलीले छनोट खेल्नु पर्ने हुन्छ ।
