एजेन्सी । खुट्टाको चोटबाट पीडित रोयल च्यालेन्जर्स बैंगलोर (आरसीबी)का शीर्ष क्रमका ब्याट्सम्यान रजत पाटिदारले इन्डियन प्रिमियर लिग (आईपीएल)को जारी सिजन गुमाउने भएका छन् । पाटिदार खुट्टा (गोलीगाँठा)को शल्यक्रिया गराउन बेलायत जाने भएका छन् । हाल उनलाई राष्ट्रिय क्रिकेट एकेडेमी (एनसीए)का चिकित्सकले आराम गर्न सल्लाह दिएका छन् ।
आरसीबीले यो साता दायाँ हाते ब्याट्सम्यान फिट हुने अपेक्षा गरेको थियो तर त्यसो भएन । यस्तो अवस्थामा अब बैंगलोरले उनको विकल्पबारे सोच्नुपर्छ । अजहरुद्दिन उनको विकल्प हुन सक्छन् । यद्यपि आरसीबीले पाटिदारको स्थानमा अन्य खेलाडीको घोषणा गरेको छैन ।
आरसीबीले मंगलबार आफ्नो आधिकारिक सामाजिक सञ्जालमा पाटिदार इन्डियन प्रिमियर लिगबाट बाहिरिएको जानकारी पोस्ट गरेको थियो । ‘दुर्भाग्यवश रजत पाटिदार खुट्टाको चोटका कारण आईपीएल २०२३ बाट बाहिरिएका छन् । रजतको शिघ्र स्वास्थ्य लाभको कामना गर्दछौं ।’
चोटका कारण आईपीएल १० खेलाडीले आईपीएल खेलेका छैनन् भने १० भन्दा बढी खेलाडी चोटका कारण जारी आईपीएलबाट बाहिर भएका छन् । जसमा मुम्बई, बेंगलुरु र चेन्नईका २–२ खेलाडी र दिल्ली, पञ्जाब, राजस्थान र गुजरातका एक–एक खेलाडी छन् । बाहिरिने खेलाडीमा मुम्बईका जसप्रित बुमराह र जोय रिचर्डसन, सीएसकेका मुकेश चौधरी र जेमसन, आरसीबीका विल ज्याक छन् ।
पाटीदारले गत सिजन आरसीबीका लागि उत्कृष्ट प्रदर्शन गरेका थिए । उनले आठ खेलमा १५२.७५ को स्ट्राइक रेटमा ३३३ रन बनाएका थिए । उनले एक शतक समेत प्रहार गरेका थिए ।
