काठमाडौँ । जनमत पार्टीका अध्यक्ष डा सीके राउतले बारा २ मा हुने उपनिर्वाचनमा सरकारले जालझेल गरेको आरोप लगाउनुभएको छ ।
रिपोर्टर्स क्लबमा आयोजित पत्रकार सम्मेलनमा उहाँले जनता समाजवादी पार्टी (जसपा) का अध्यक्ष उपेन्द्र यादवलाई सरकारले चोरबाटो बाट संसद्मा ल्याउन जालझेल गरेको आरोप लगाउनुभयो ।
उहाँले कसैलाई चोर बाटोबाट प्रवेश गर्न नदिने बताउनुभयो । डा राउतले उपेन्द्रलाई लक्षित गर्दै भन्नुभयो, “बारा २ मा हुने उपनिर्वाचन कुनै उम्मेदवारबीचको प्रतिस्पर्धामात्रै होइन । यो लोकतन्त्र कायम राख्ने र त्यसलाई मजाक बनाउनेबीचको प्रतिस्पर्धा हो । कसैलाई चोर बाटोबाट पसाउने कामको लागि जालझेल रचियो । बारा २ मा जबरजस्ती सीट खाली गर्न लगाइयो । जनताले दिएको जनमतको अपमान भयो । जनताले अपेक्षाका साथ मतदान गरेको छ ।”
सीट खाली हुनेबित्तिकै सरकारको मिलेमतोमा निर्वाचन आयोगले चुनावको मिति घोषणा गरेको उहाँको भनाइ थियो । उहाँले उपराष्ट्रपतिको निर्वाचनमा पनि धाँधली गरेर महिलाले पाइसकेको अधिकार खोस्न लगाएको बताउनुभयो ।
“कसैलाई मन्त्री बन्न छट्पटाहट छ । उहाँले पार्टीमा म मन्त्री नभएसम्म तिमीहरु पनि पाउँदैनौँ भन्ने खालको ध्येय छ । या त म हुन्छ नत्र कोही पनि हुँदैन । यस्ता नेताहरुको हत्या गर्ने, राजनीतिक कार्यकर्ताको हत्या गर्ने परिपाटी त्यहाँ छ । त्यो मन्त्री बन्न वैशाख १० मै निर्वाचन गराउन दबाब दिएर रोइकराइ गरेका छन्”, उहाँले भन्नुभयो ।
ठूलो मतान्तरले पराजित भएको चार महिना पनि नभएको र जनताले रिजेक्ट गरेको अवस्थामा जबरजस्ती फेरि उठाउन खोज्नु जनमतको अपमान भएको उहाँको भनाइ थियो ।
अध्यक्ष राउतले बारा २ का जनताले विद्रोह गरेर स्थानीय उम्मेदवारलाई नै जिताएर पठाउने दाबी गर्दै नेकपा ९माओवादी केन्द्र० का नेता तथा पूर्वमन्त्री शिवचन्द्र कुशवाहलाई जनमत पार्टीमा भित्र्याएर बारा २ को उम्मेदवारको रुपमा अगाडि सार्ने बताउनुभयो ।
