काठमाडौँ । बागमती प्रदेशका मुख्यमन्त्री शालिकराम जम्मकट्टेललाई प्रदेशसभाको बैठकबाट विश्वासको मत लिन अप्ठ्यारो भएको छ ।
बुधबार दिउँसो ३ बजेका लागि बोलाइएको प्रदेशसभाको बैठकमा मुख्यमन्त्री जम्मकट्टेलले विश्वासको मत लिने कार्यसूची थियो तर सत्ता गठबन्धनमा रहेको र प्रदेशकै ठूलो दल नेपाली कांग्रेसका प्रदेशसभा सदस्यहरु काठमाडौँमा छन् ।
कांग्रेसले मुख्यमन्त्री जम्मकट्टेलसँग दुई दिनको समय मागेको छ । कांग्रेस प्रदेशसभा सदस्य हरिप्रभा खड्गीले संसदीय दलको बैठक चलिरहेको र दलमा पनि छलफल नभएकाले दुई दिनको समय मागेको जानकारी दिनुभयो ।
प्रदेशसभाको बैठकमै कांग्रेसको अनुपस्थितिका कारण मुख्यमन्त्री जम्मकट्टेलले प्रदेशसभाको बैठक स्थगित गर्न चाहनुभएको छ । प्रदेशसभा सचिवालयका सहायक प्रवक्ता गोपाल पोखरेलले अहिलेसम्म मुख्यमनन्त्री कार्यालयबाट कुनै पत्र नआएकाले बैठक स्थगित नभएको जानकारी दिनुभयो ।
नेकपा (माओवादी केन्द्र) प्रदेश संसदीय दलका नेता जम्मकट्टेल नेकपा (एमाले) र राष्ट्रिय प्रजातन्त्र पार्टी (राप्रपा) को समर्थनमा मुख्यमन्त्री बन्नुभएको थियो । तर राष्ट्रपति निर्वाचनमा नेपाली कांग्रेसका रामचन्द्र पौडेल राष्ट्रपतिमा निर्वाचित भएपछि केन्द्रदेखि प्रदेशसम्म सत्ता समीकरण परिवर्तनको असर देखिएको छ ।
राप्रपाले सरकारबाट आफ्ना मन्त्री फिर्ता बोलाउँदै सरकारलाई दिएको समर्थनसमेत फिर्ता लिएपनि एमाले भने सरकारमै छ । यद्यपि सत्ता गठबन्धन हेरफेर भएकाले मुख्यमन्त्री जम्मकट्टेलले नेपाली कांग्रेसलाई साथमा लिएर सरकार गठन गर्ने तयारी गर्नुभएको छ ।
