काठमाडौँ । लेजेन्ड्स लिग क्रिकेटको उपाधि राष्ट्रिय क्रिकेट टोलीका पूर्वकप्तान पारस खड्का सम्मिलित एसिया लायन्सले जितेको छ ।
सोमबार राति सम्पन्न फाइनलमा खेलमा वर्ल्ड जायन्ट्सलाई ७ विकेटले हराउँदै एसिया च्याम्पियन बनेको हो । फाइनलमा जायन्ट्सले दिएको १४८ रनको लक्ष्य लायन्सले १६.१ ओभरमा ३ विकेट गुमाएर भेट्टायो ।
एसियाका लागि ओपनरद्वय उपुल थरंगा र तिलकरत्ने दिलशानले अर्धशतीय इनिङ्स खेले । ४२ बलको सामना गरेका दिलशानले ८ चौकासहित ५८ रन बनाउँदा थरंगाले २८ बलमा पाँच चौका र तीन छक्काको मद्दतमा ५७ रन जोडे । पारसले भने फाइनलमा ब्याटिङमा मौका पाएनन् ।
बलिङमा जायन्ट्सका समित पटेल, ब्रेट ली र मोन्टी पनेसरले एकरएक विकेट लिए । त्यसअघि दोहास्थित वेस्ट एन्ड पार्क अन्तर्राष्ट्रिय क्रिकेट रंगशालामा टस जितेर पहिले ब्याटिङमा उत्रिएको जायन्ट्सले निर्धारित २० ओभरमा ३ विकेट गुमाएर १ सय ४७ रन बनायो ।
उसका लागि ज्याक कालिसले ५४ बलमा ५ चौका र र ३ छक्कासहित अविजित ७८ रन बनाए । त्यस्तै, रस टेलरले ३२ र लेन्डल सिमन्सले १७ रन जोडे । एसियाका लागि अब्दुर रज्जाकले दुई र थिसरा परेराले एक विकेट लिए । पारसले फाइनलमा बलिङमा पनि अवसर पाएनन् ।
