काठमाडौं । नेपाली क्रिकेट टिमका स्पिनर सन्दीप लामिछाने सन् २०२३ मा हालसम्म सर्वाधिक विकेट लिने बलर बनेका छन् । सन्दीपले ८ म्याचमा २२ विकेट लिएर उनी विश्वभरका बलरहरुको सूचीमा अग्रस्थानमा रहेका छन् । औसत १५.०९ बलमा विकेट लिइरहेका उनले प्रतिओभरमा ४.१८ रन खर्चेका छन् ।
नामिबियाका आर ट्रिम्पेलम्यान दोस्रो स्थानमा रहेका छन् । उनले ६ म्याचमा १५ विकेट लिएका छन् । आइसीसी विश्व वरियताको पहिलो नम्बरमा रहेका भारतका मोहम्मद सिराज भने यस वर्षको सर्वाधिक विकेट लिनेमा तेस्रो नंबरमा परेका छन् । उनले ५ खेलमा १४ विकेट लिएका छन् ।
करण केसी पनि २०२३ मा सर्वाधिक विकेट लिने टप १० बलरमा परेका छन् । सूचीको छैटौं नम्बरमा रहेका करणले ९ म्याचमा १३ विकेट लिएका छन् । उनले औसत ३१.३८ बलमा एक विकेट लिइरहेका छन् भने प्रति ओभरमा ५.७३ रन खर्चेका छन् ।
यस्तै, नेपालका ओपनर आसिफ शेख सन् २०२३ मा सर्वाधिक रन बनाउने ब्याट्सम्यानहरुको सूचीमा परेका छन् । आसिफले हालसम्म ९ खेलमा ३६५ रन बनाएर सूचीको तेस्रो स्थानमा रहेका छन् । भारतका सुभमन गिल ६ खेलमा नै ६५७ रन बनाएर पहिलो स्थानमा छन् । बिराट कोहली र रोहित शर्मा, ईंग्ल्यान्डका डेविड मलान र डेभोन कोनवे भने आसिफभन्दा पछाडि रहेका छन् ।
यस्तै, नेपालका ब्याट्सम्यान कुशल मल्ल र रोहितकुमार पौडेल भने क्रमश: २९५ र २६४ रनसहित आठौं र दशौं स्थान छन् । कुशल भुर्तेल २३९ रन बनाएर १३ औं नम्बरमा छन् ।
