काठमाडौँ । आईसीसी विश्वकप लिग टू अन्तर्गतको त्रिकोणात्मक सिरिजमा नेपालले घरेलु टोली यूएईलाई पराजित गरेको छ । सोमबार दुबई अन्तर्राष्ट्रिय क्रिकेट स्टेडियममा भएको अन्तिम खेलमा नेपालले यूएईलाई ४२ रनले हराएको हो ।
२३० रनको विजयी लक्ष्य पछ्याएको यूएई ४५ ओभरमा अलआउट हुँदै १८७ रनमात्र बनाउन सक्यो । यूएईका लागि आशिफ खान र आर्यान लक्राले अर्धशतकीय इनिङ्स खेलेपनि टोलीलाई जित दिलाउन सकेनन् । आशिफ खानले सर्वाधिक ८२ रन जोडे । उनले ११५ बलमा दुई चौका र ३ छक्का प्रहार गर्दै उक्त रन जोडेका हुन् । यस्तै लक्राले ७८ बलमा ५० रन जोडे । भृत्तीय अरविन्द १३ रनमा आउट हुँदा अन्य ब्याट्सम्यानले दोहोरो अंक बटुल्न सकेनन् ।
नेपालका लागि सोमपाल कामी र दिपेन्द्र सिंह ऐरीले तीन–तीन विकेट लिँदा करण केसी, आरिफ शेख र सन्दीप लामिछानेले एक–एक विकेट लिए । त्यसअघि टस जितेर पहिलो ब्याटिङ रोजेको नेपालले ५० ओभरको निर्धारित खेलमा ८ विकेट गुमाएर २२९ रन बनायो । ६८ रनमा ५ विकेट गुमेको अवस्थामा नेपालको पारी भीम सार्की, सन्दीप लामिछाने र आरिफ शेखले उकासेका थिए ।
सार्कीले ९९ बलमा ७ चौकाको सहयोगमा महत्त्वपूर्ण ७० रन बनाए । सार्की र लामिछानेले छैटौँ विकेटको साझेदारीमा ५६ रन जोडेका थिए । सन्दीप व्यक्तिगत २७ रनमा आउट भए । त्यसपछि आएका आरिफ शेखले सार्कीसँग अर्को ५६ रनको साझेदारी गरेका थिए ।
४४.३ ओभरमा १८० को स्कोरमा सार्की आउट भएपछि आएका करण केसीले एक छक्का र एक चौकाको सहयोगमा १७ रन बनाए । केसी आउट भएपछि आएका प्रतिस जिसीले ६ बलमा एक चौकाको सहयोगमा ११ रनमा अविजित रहे । शेखले ५६ बलमा २ चौका र एक ६ सहित अविजित ४३ रन बनाए ।
यसअघि टप अर्डरका ब्याटरहरु फटाफट आउट भएका थिए । ओपनरद्वय ज्ञानेन्द्र मल्लले ११ र आशिफ शेखले ६ रन बनाए भने कुशल मल्लले दुई चौका र दुई छक्कासहित ३२ बलमा ३२ रन बनाए । कप्तान रोहित पौडेल १ रन र दीपेन्द्रसिंह ऐरी ४ रनमा आउट भएका थिए ।
बलिङतर्फ युएईका जुनेद सिद्दीकीले ३, रोहन मुस्तफा र आर्यल लाक्राले समान २/२ तथा कार्तिक मेइयापनले १ विकेट लिए ।
